16 июня 2010 г.
1962 çул тĕлне строительство материалĕсен тата улма-çырлапа пахча çимĕç комбиначĕсем хута кайнă. Çывăх вăхăтрах Шăхасанта пахча çимĕç консервламалли завод, Улатăрта хут кăларакан фабрика тума палăртнă.
Халăх пурнăçĕ лайăхланса пынине сутнă таварсен калăпăшĕ те çирĕплетет. Çулталăкра çеç 10300 велосипед, 940 мотоцикл, кĕпе çумалли 800 машина, 80 холодильник, 1300 телевизор, 3 пине яхăн радиоприемникпа радиола, 7600 çĕвĕ машини тата ытти электроприборсем реализациленĕ. Потребкоопераци юлашки 3 çулта тăхăнмалли япаласем çĕлекен тата юсакан 41, атă-пушмак çĕлекен 13, сехет тата радиоаппаратура юсакан 4 мастерской, 8 парикмахерски, 14 прокат пункчĕ уçнă. 1965 çулта Çĕрпÿре сăра завочĕ тума пуçланă.
1970 çулта Чăвашпотребсоюза лайăх ĕçленĕшĕн тата 50 çулхи юбилейĕ ячĕпе Чăваш АССР Верховнăй Совечĕн Хисеп грамотине парса чысланă.
Канашра 3 пин тăваткал метр лаптăк йышăнакан районсем хушшинчи универсаллă база хута кайнă. Унта таварсене электропогрузчиксем пулăшнипе тиенĕ.
1974 çултан пуçласа поварсен республикăри конкурсне ирттернĕ.
1971—1975 çулсенче Чăвашпотребкооперацийĕ 8 хутчен РСФСР, ВЦСПС, Центросоюз, Роспотребсоюзăн Хĕрлĕ ялавне çĕнсе илнĕ.
1982 çул тĕлне вак таварсемпе суту-илÿ тăвакан лавккасем 2661, обществăлла апатлану предприятийĕсем 1358 çитнĕ.
Чăвашпотребсоюзăн комбиначĕсем Германири, Чехословакири, Венгрири, Финляндири предприятисемпе çыхăну тытнă, унта чĕр тавар нумай ăсатнă. Потребкоопераци çумĕнче 1991—1994 çулсене çĕвĕ цехĕ нумай уçнă.
1999 çулта халăха йăла пулăшăвĕ парассине аталантарассине ытларах тимлĕх уйăрма пуçланă, ятарлă постановлени йышăннă. Парикмахерскисем, фотоательесем, атă-пушмак, сехет, телерадиоаппаратура юсакан мастерскойсем уçнă.
Чăвашпотребсоюз совечĕ юлашки çулсенче татах та ытларах ĕçленĕ. Çĕнĕлĕхсемпе усă курнă, кураççĕ те. Малтанах самообслуживани магазинĕсем хулара çеç пулнă пулсан, халĕ çакна район центрĕсене те çитерчĕç. Çăм тапакан цехсем, автозаправкăсем тата ытти хушма предприятисем тухăçлă ĕçлеççĕ.
90 çул хушшинче Чăвашпотребсоюз нумай-нумай наградăна тивĕçнĕ. Унта ĕçлекенсенчен иккĕшĕ В.П.Куракина (Вăрмар районĕ), М.Н.Харитонов (Чăвашпотребсоюз правленийĕн председателĕ) Ленин орденне тивĕçнĕ. Октябрьти Аслă революци, Ĕçлĕх Хĕрлĕ Ялав, Халăхсен туслăхĕ, «Хисеп палли», Ĕç Мухтавĕн II тата III степеньлĕ орденĕсемпе наградăланисем те чылаййăн. Уйрăмах пултаруллисене «Ĕçри хастарлăхшăн», «Ĕçре палăрнăшăн» медальсемпе чысланă. «Раççей Федерацийĕн тава тивĕçлĕ ĕçченĕ», «Раççей Федерацийĕн тава тивĕçлĕ экономисчĕ», «Раççей Федерациĕн транспортăн тава тивĕçлĕ ĕçченĕ» те йышлă. «Чăваш АССР суту-илÿ тава тивĕçлĕ ĕçченĕ», «Чăваш Республикин халăх ыйтăвĕсене тивĕçтерессин тава тивĕçлĕ ĕçченĕ», «Чăваш АССР тава тивĕçлĕ экономисчĕ», «Чăваш Республикин тава тивĕçлĕ ĕçченĕ», «Чăваш АССР транспортăн тава тивĕçлĕ ĕçченĕ», «Чăваш Республикин тава тивĕçлĕ строителĕ», «Чăваш Республикин тава тивĕçлĕ вĕрентекенĕ», «Чăваш Республикин тава тивĕçлĕ шкул ĕçченĕ», «Чăваш АССРĕн тава тивĕçлĕ культура ĕçченĕ» ятсене тивĕçнисем çĕршерĕн. Ятарласах хисеплĕ ятсен списокне илсе кăтартрăм. Çакă Чăвашпотребсоюз пĕр суту-илÿпе çеç ĕçлеменнине туллин çирĕплетсе парать. Вăй хумасăр çав наградăсене те, хисеплĕ ятсене те илеймĕн. Чăвашпотребсоюзра тăрăшнисем çĕр-шыв шайĕнче палăрмалли пĕлтерĕшлĕ ĕçсем пурнăçланине пĕлтерет. Унăн ĕç-хĕлне пĕр статьяра çеç туллин çутатса кăтартма çук. Çулсерен тенĕ пекех вăл Раççей шайĕнче палăрса тăнă, тĕрлĕ награда илнĕ. Паянхи кун та ăнăçлă ĕçлесе пырать. Çĕнĕрен çĕнĕ объектсем уçать, уйрăм предпринимательсем хушшинче çухалса каймасть. Хуласенче те, район центрĕсенче те ĕçлет, çав вăхăтрах пĕчĕк, пĕтсе пыракан ялсене те манса хăвармасть.
Малашне те Чăвашпотребсоюз ĕçлетĕр, халăхăн кирлĕ ыйтăвĕсене тивĕçтертĕр. Ăнăçу пултăр сире.
Источник: "Каçал Ен"