11 июня 2010 г.
Кашни ялтах пултаруллă, обществăлла ĕçсене йĕркелеме пултаракан çынсем пур. Çĕнĕ Кипеç тата Тĕвенеш ялĕсенче пурăнакансем пухура ял старости пулма Галина Ивановна Новикована шанчĕç. Вăл хĕрарăмсен совечĕн председателĕ те.
Ялсенче пурăнакансен шанăçне тÿрре кăларса пырать. Эпир унпа кăмăллă. Тирпей-илем енĕпе тимлеме пуçларĕ. Халĕ ялсен урамĕсем илĕртÿллĕрех. Масарсенче те тасалăх хуçалантăр тесе тăрăшрĕ, халăха çак ĕçе явăçтарчĕ.
Пушар хăрушлăхĕ пирки чылай калаçатпăр. Сăмахланипе çеç ĕç пулмасть. Галина Ивановна «Изамбаево» ял хуçалăх кооперативĕн кивĕ пушар машинине юсассине йĕркелес енĕпе те тăрăшрĕ. Ял çыннисенчен укçа-тенкĕ пуçтарма тăрăшрĕ. Çакă — пархатарлă ĕç. Вут-кăвар сисмен çĕртенех тухать.
Ял кĕтĕвĕ пирки те ыйтăва татса пачĕ.
Тăван çĕр-шывăн Аслă вăр-çинче вилнисене асăнса лартнă палăка та пăхса тăрать. Çакă та унăн тăрăшулăхне туллин çирĕплетет.
Ялта музей пурччĕ. Вăл паха экспонатсемпе пуянччĕ. Ăна А.А.Ченакин, С.А.Андреев вĕрентекенсем йĕркеленĕччĕ. Вăл тĕрлĕ çĕре куçрĕ. Пĕтмех пуçланăччĕ. Г.Новикова ăна сыхласа хăварчĕ. Çĕнĕ Кипеç ялĕнче вырăн тупрĕ. Ку ĕçе пурнăçлама Н.И.Ивановпа Н.И.Ва- сильев пулăшрĕç.
Кăçал Тăван çĕр-шывăн Аслă вăрçинче Çĕнтерÿ тунăранпа 65 çул çитрĕ. Çак ятпа парад йĕркелерĕç. Унта ял администрацийĕн пуçлăхĕ Г.Е.Ефремов, Н.И.Иванов, В.И.Иванов, Н.И. Васильев пуçтарăннисене, ĕç тата вăрçă ветеранĕсемпе участникĕсен ячĕпе салам сăмахĕсем каларĕç. Ялти ветерансен совечĕн председателĕ Н.Е.Сергеев хăйсем пурнăçланă ĕçсем пирки доклад туса пачĕ. Культура ĕçченĕсем, шкул ачисем хаваслă юрă-кĕвĕ шăрантарчĕç. Çак меропиряти те Галина Ивановна тăрăшулăхĕсĕр пулмарĕ. Ăна малашне те вăй-хал, ăнăçу сунас килет.