09 июня 2010 г.
Кăçалхи майăн 19-мĕшĕнче Федераллă саккунпа патшалăх символикисемпе усă курасси, формăллă тумтир тăхăнса çÿресси пирки РФ уйрăм саккунĕсене улшăнусем кĕртнĕ. Раççей ялавĕпе, гербĕпе, гимнĕпе официаллă усă курмалли йĕркене пăснă, патшалăх наградисене çакса çÿрес тата формăллă тумтире тăхăнас тĕлĕшпе çитменлĕхсем пулнă тĕслĕхсемшĕн яваплăха ÿстернĕ. Маларах патшалăх символикисемпе саккуна пăснăшăн граждансене 300—500 тенкĕ, должноçри çынсене 500—1000 тенкĕ административлă штраф панă. Халĕ вара уйрăм çынсен 2000—3000 тенкĕ, должноçрисен 5000—7000 тенкĕ штраф тÿлеме тивĕ. Юридици енĕпе вăйра тăракансен вара 100—150 пин тенкĕ кăларса хума тивĕ.
Патшалăх наградисене саккунпа пăсса çакса çÿренĕшĕн те штрафсене пысăклатнă. Унччен 100—300 тенкĕ пулнă пулсан, халĕ 1—1,5 пин тенкĕ тÿлеттерĕç. Патшалăх çар организацийĕсен, право, тĕрĕслев органĕсен символикиллĕ паллисемлĕ (знаксем) формăллă тумтире саккуна пăсса тăхăннăшăн та штрафсене ÿстернĕ.
Патшалăх наградисем евĕрлĕ паллăсем туса хунăшăн е вĕсене хатĕрленĕшĕн те яваплăха хытарнă. Çĕнĕ саккун йышăниччен айăплав граждансемшĕн 300—500 тенкĕ, должноçри çынсемшĕн 500—1000 тенкĕпе танлашнă, саккуна улшăнусем кĕртнĕ хыççăн граждансене 1,5 — 2 пин, должноçри çынсене 4—5 пин тенкĕлĕх штрафлаççĕ. Юридици енчен вăйра тăракансемшĕн административлă яваплăх 85—100 пин тенкĕ пулĕ.
Обществăлла пĕрлешÿсен символики, вĕсен прависемпе тивĕ-çĕсем тĕлĕшпе те улшăнусем пур. Халĕ вĕсен символики Раççей Федерацийĕн тата вĕсен субъекчĕсенни тата ют çĕршывсенни евĕр çеç мар, муниципаллă тытăмсенни, федераллă тата регионсенчи патшалăх органĕсенни, РФ Хĕç-пăшаллă вăйĕсенни тата ытти çар тытăмĕсенни пек .