09 июня 2010 г.
«Восток» ял хуçалăх кооперативĕнче çурхи ака-суха ĕçĕсем хыççăн Акатуй уявне йĕркелесси йăлана кĕнĕ. Çапла пулмалла та ĕнтĕ. Ĕçленипе пĕрлех ушкăнпа савăнма, канма та пĕлмелле.
Хуçалăх ертÿçи В.Г.Михеев та çак шухăшсенех палăртнă. Пултаруллă механизаторсене, выльăх-чĕрлĕх пăхакансене саламласа парнесем панă. Малашне те пĕрле килĕштерсе ĕçлеме вăй-хал суннă. Район администрацийĕн пуçлăхĕн çумĕн, ял хуçалăх пайĕн начальникĕн Г.М.Киргизовăн сăмахĕсенче те тĕпрен илсен, çав шухăшсемех пулнă. Вăл «Восток» ял хуçалăх кооперативĕ уй-хир отраслĕпе те малтисен ретĕнче пулнине, аш-какай, сĕт туса илес енĕпе ăнăçлă ĕçленине палăртнă. Кÿршĕ хуçалăхсенчен килнисем те хырхĕррисене, хурнайсене, вăрманхĕрричурачăксене, кĕтнепасарсене малашне те çитĕнÿсем тума ырлăх-сывлăх суннă.
Юрă-ташăсăр мĕнле уяв пултăр. Хырхĕрри культура çурчĕ çумĕнчи художество пултарулăх коллективĕ, ялсенчи ăста юрăçсем, шкул ачисем сцена çине тухса пуçтарăннисене савăк кăмăл парнеленĕ.
Спорта юратакансем вара ялсенчи пултаруллă, ăста, маттур çынсем тĕрлĕ тупăшусенче вăй виçнине пăхса ăмăртакансене хавхалантарнă.
Кунти халăх ĕçре çеç мар, юрă-ташăра та, спорт ăмăртă-вĕсенче пултаруллă пулнине туллин çирĕплетнĕ.
Ял ĕçченĕсем çак кун кăмăлтан савăннă. Кунта канса савăннă хыççăн кооперативра ĕçлекенсем çĕнĕ вăй-халпа ĕç вырăнне тухнă. Ял çыннин пурнăçĕ çавăн пек çав.