05 июня 2010 г.
Чăваш Ен Патшалăх Канашĕн 28-мĕш сессийĕнче патшалăхăн тепĕр наградине туса хурассине ырланă. «Юратупа шанчăклăхшăн» ордена Чăваш Республикинче çемье институтне çирĕплетес, кăмăл-сипет пуянлăхне аталантарас тĕлĕшпе йышăннă. Кун пек награда хальлĕхе Раççей Федерацийĕн пĕр субъектĕнче те çук.
Ăна Чăваш Республикинче пурăнакан, арлă-арăмлă 50 е ытларах та çул тăракансем тивĕçĕç. Вăл çемьере юратупа шанчăклăх хуçаланмалла, ăнлану пулмала, çĕр-шыва усă кÿрекен ачасем пăхса çитĕнтермелле, сывă пурнăç йĕркине тытса пымалла.
Çулсеренех Чăваш Енти 50 çемьене Пĕтĕм тĕнчери çемье, юратупа шанчăк кунĕнче (июлĕн 8-мĕшĕ) тата «Çулталăк çемйи» (ноябрь уйăхĕнче) республикăри конкурсра çак орденпа наградăлĕç.
Унăн эскизлă проектне Раççей Федерацийĕн тава тивĕçлĕ художникĕ В.В.Николаев хатĕрленĕ.