05 июня 2010 г.
«Суперкласс!» конкурс пирĕн районта чăннипех те çÿллĕ шайра иртрĕ. Эпир те унта хутшăнса финала çитме пултартăмăр. Çав вăхăтра нумай-нумай хатĕрленме, вĕренме тиврĕ. Тĕп парнене, Мускава кайса курмах тивĕçеймерĕмĕр пулин те, Шупашкар хулине çитме пултартăмăр. Уншăн та тем пекех савăнтăмăр. Тĕрлĕ çĕрте пултăмăр. Шупашкарти паллă вырăнсемпе паллашрăмăр. «Макдонольдс» кафере пулса курниех мĕне тăрать. Чăваш Республикин Патшалăх Канашĕн çуртĕнче те пулса куртăмăр. Эпир, П.Семенов тăрăшнипе, депутатсен ларăвĕ иртекен пÿлĕмпе те паллашрăмăр. Правительство çуртĕнче пулни те ĕмĕрлĕхех асра юлать.
«Мир Луксор» кинотеатрта мультфильм курма майсем туса пани те пысăк парне. Чылайăшĕ унта пĕрремĕш хут пулчĕ. Наци музейĕпе паллашнă май нумай çĕннине пĕлтĕмĕр.
Çакăн евĕр экскурси йĕркелени пирĕншĕн калама çук паха. Эпир, ачасем, вĕрентекенсем, РФ Патшалăх Думин депутатне П.Семенова, унăн пулăшаканĕсене парнешĕн тав тăватпăр. Вĕсем малашне те çакăн пек мероприятисем йĕркелесе республикăри ытти ачасене те савăнтарасса шанас килет. Пурне те ăнăçу сунатпăр.