02 июня 2010 г.
Эпĕ Комсомольски 1-мĕш вăтам шкулĕнче вĕренетĕп, çавăн пекех ачасене пĕрлештерсе тăракан «Шкул республикин» президенчĕ те.
«Шкул республики» 5—11 классене пĕрлештерсе тăрать. Мĕн тума кирлĕ-ха ачасен организацийĕ; Ман шутпа, çакă вăл шкул ачисен пурнăçне пуянлатма, вĕсене хăйсем тĕллĕн ĕçлеме, пурнăçра пĕрремĕш утăмсем тума пулăшать. «Пысăк ĕç пĕчĕккинчен çуралать», теççĕ халăхра. Чăваш Республикин Президенчĕ те шăпах çавăн çинчен çырать. Малалла çĕнĕ техника аталаннă май çĕр-шывра кăткăс ыйтусене татса пама пĕлекен çынсем кирли çинчен те ыйтусем тăратать вăл.
Пирĕн «Шкул республикин» ĕçне президент, Е.Свинина, Д.Челакова, И.Ефремов, А.Атласкина министрсем ертсе пыраççĕ. А.Минибаев вице-президент, министрсем уйрăмах пултаруллă. «Шкул республикин» хăйĕн конституцийĕ, символĕсем, устав пур. Уставра, сăмах май, çакăн пек канашсем пур: «Ултавпа усала чарса лартма тăрăш», «Ырă чунпа пуян пул» тата ыттисем те.
2010 çула пирĕн çĕр-шывра Çĕнтерÿ пулнăранпа 65 çул çитнине тата Вĕрентекен çулталăкне халалланă. Эпир çакна ăшă кăмăлпа йышăнатпăр. Мĕн чухлĕ проект, сочинени, мультимедийлă презентаци хатĕрлемерĕç пулĕ ачасем. А.Широкина, Е.Свинина, А.Титова, Р.Воробьев, Л.Мальчиков, А.Мамуткин, И.Михайлова, А.Соловьев кăçалхи вĕренÿ çулĕнче республика шайĕнче палăрчĕç.
Пирĕн шкул ачисем юрă-ташăпа та малтисен ретĕнче. Республика шайĕнче иртекен «Пĕчĕк çеç путене» фольклор фестивалĕнче 2-мĕш вырăн йышăнса зонăри фестивале хутшăнма тивĕç пултăмăр. «Пасхальная радость» уявра та ла-йăх енĕпе палăртăмăр. Шкул чысне çак мероприятире А.Яфизова, И.Габайдуллина, К. Жукова, А.Атласкина, А.Титова, А.Мамуткина, А.Семенова, А.Каюкова, И.Карзакова, И.Ефремов, Н.Михайлов, Д.Спиридонова хÿтĕлерĕç.
Пирĕн шкул ачисем КВНсене хутшăнса кашни çулах хăйсен пултарулăхĕпе савăнтараççĕ. Кăçал та Шупашкарах çитрĕç. С.Сергеев, И.Ефремов, А.Атласкина, Д.Челакова, А.Титова, А.Назмеева, А.Минибаев чăнах та артистсем пек выляççĕ.
Темиçе çул ĕнтĕ шкулти волонтерсен командине шкул педагог-психологĕ Н.А.Мельникова ертсе пырать. Мĕнле кăна дипломсем, Хисеп грамотисем илмен-ши шкул команди;
Уйрăмах ачасен командин лидерне К.Свининăна палăртас килет. Çак кунсенче вăл район тата шкул чысне республикăра хÿтĕлеме хатĕрленет.
Нумай ача спорта кăмăллать. Вĕсем волейболла, хоккейла, баскетболла выляса, йĕлтĕрпе чупса тата ытти енсемпе те район чысне хÿтĕлеççĕ. А.Мамуткин, В.Галкин, А.Тимофеев, М.Крылов, Д.Миллин, И.Токмаков, С.Шкаблев, В.Фадеев, А.Лебедев тата ыттисем те спортра пултаруллă.
Шкулти волейбол тата баскетбол командисене районта нумайăшĕ пĕлеççĕ. Уйрăмах М.Герасимова, А.Атласкина, М.Чернова, Н.Галкина, М. Петрова, А.Суратова тата ыттисем хăйсен вăййисемпе савăнтараççĕ.
Шкулта уроксем хыççăн мĕнле кăна конкурс, вăйă иртмест пулĕ; Акă нумаях пулмасть В.Г.Гордеев вĕрентекен ертсе пынипе ачасем фотоконкурс йĕркелерĕç. «Шкул республики» паянхи самана уттипе тан пырать тесе шутлатăп. Паллах, ачасене вĕрентекенсем пулăшса пыни, вĕсем пирĕнпе пĕрле пулни тата лайăхрах ĕçлеме хавхалантарать. Н.А.Атласкин, С.В.Михайлова директор çумĕсем, А.Н.Артемьева вожатăй министрсене вĕрентеççĕ, сĕнÿсем параççĕ. Çавăн пекех А.С.Терентьев директор та усăллă канашсем парать.
«Шкул республики» пĕр çитменлĕхсĕр ĕçлет тесе калама çук. Паянхи чи пысăк тĕллев – ачасене шкул тулашĕнчи пурнăçпа кăсăклантарасси. Хăш-пĕр ачасем нимĕн те тăвасшăн пулманни те пăшăрхантарать. Тепĕр чухне аслăраххисем те : «Сана мĕн тума кирлĕ-ха çак ĕç;» — тени тĕлĕнтерет. Ара, усал тума вĕрентмеççĕ-çке шкулта, лайăх пултăр тесе тăрăшаççĕ.
Ачасен организацийĕн малашнехи ĕмĕчĕсем пысăк. Чи малтанах – кĕçĕннисене – 1— 4-мĕш класра вĕренекенсене ĕçе хутăштарасси.
«Тимур командисене» çĕнетесси, «Шкул республикин» кунне уявласси, çĕнĕ проектсем тăвасси, активлă ĕçлекен ачасене палăртса наградăласси, çĕнĕ гимн, символикăсен конкурсне ирттересси тата ытти те.