02 июня 2010 г.
Майăн юлашки кунĕсенче çумăр çурĕ, çанталăк та палăрмаллах ăшăтрĕ. Тахçанах çакна кĕтнĕ йывăç-курăк ешерсе çÿлелле туртăнчĕ. Çĕр çинче пурăнакансем малашне те ырлăх курччăр тенĕ пекех туйăнать. Çак кунсенче ĕнтĕ Ольга Петровна Кузьмина пирĕнтен ĕмĕрлĕхех уйрăлса кайрĕ. Тăхăрвунна çитекен ватă хĕр арăма юлашки çула ăсатма нумайăн пуçтарăнчĕç. Апла пулсан çывăх çыннисем, юлташĕсем, тăванĕсем çакă хастар, пултаруллă çынна асра тытаççĕ.
Ольга Петровна Кузьмина 1921 çулта çут тĕнчене килнĕ. Ултă ачаран асли пулнă вăл. Çамрăк Оля мĕн пĕчĕкренех çынсен сывлăхне сыхлама ĕмĕтленнĕ. Çавăнпа ĕнтĕ вăл шкул пĕтерсен Канашри медицина училищине вĕренме кĕнĕ. Ун хыççăн Шăмăршă район больницинче ĕçлеме пикенет. Унта Ольга Петровнăна операци тунă çĕре аслă медсестра пулма çирĕплетеççĕ. Пилĕк çулта вуншар операци тума хутшăнать, çынсене йывăр чир хыççăн ура çине тăратать.
Вăрçă пуçлансанах ашшĕне унта илсе каяççĕ. Хаяр çапăçусенче вăл паттăрсен вилĕмĕпе вилет. Амăшĕн аллинче тата пилĕк ача тăрса юлать. Кĕçĕннисене ура çине тăратас тесе мĕн май килнĕ таран пулăшать Оля. Çакна кура-ши, çамрăк хĕре тăван Елчĕк районне куçараççĕ. Пурнăç çулĕ ăна çамрăк инженерпа Гранат Иванович Кузьминпа паллаштарать. Каярахпа çамрăк мăшăрăн Сергей ывăл çуралать.
Вăхăт иртсен Кузьминсем Комсомольски районне куçса килеççĕ. Ольга Петровна районти ял хуçалăх техникин сывлăх пунктĕнче медсестрара ĕçлеме пикенет. Упăшки вара райтехнадзор инженерĕнче тăрăшать. Ывăлĕ, Сергей, çар училищине пĕтерет, çĕр-шывăн тĕрлĕ кĕтесĕнче службăра тăрать. 1984 çулчченех вăй хурать Ольга сельхозтехникăн здравпунктĕнче. Çакăнтанах пенсие каять. Патшалăх ăна «1941—1945 çулсенче хастар ĕçленĕшĕн», юбилей медалĕсемпе наградăлать. Ольга Петровнăн Хисеп хучĕсен шучĕ те çук. Тĕрлĕ организацисемпе сывлăха сыхлакан учрежденисем панă вĕсене.
Ывăлĕ, Сергей, тĕрлĕ çĕрте службăра тăнă хыççăн пирĕн районта çар комиссариатĕнче ĕçлет. Сăмах май каласан, Сергей Гранатович Кузьмин подполковник — хамăр районта çуралнă пĕрремĕш çар комиссарĕ.
Çапла, Ольга Петровна Кузьмина хăй хыççăн тарăн йĕр хăварчĕ.Тăванĕсемпе çывăх çыннисем нихăçан та манмĕç медсестрара ĕçленĕ тыл ветеранне.