02 июня 2010 г.
Иртнĕ шăмат кун, майăн 29-мĕшĕнче, Урмаел ялĕ çумĕнчи лапама виçĕ пине яхăн çын Сабантуя пухăнчĕ. Çак асамлă уявра ватти-вĕтти мĕн каçченех савăнчĕ, спорт мероприятийĕсене пăхса киленчĕ.
Уй-хир ĕçĕсене ăнăçлă, тухăçлă вĕçленĕ ял çыннисене район пуçлăхĕ Г.Ф.Волков, Чăваш Республикин Патшалăх Канашĕн депутачĕ К.С.Мифтахутдинов, Комсомольски райпо совечĕн председателĕ Е.И.Карпеев, Урмаел ял поселенийĕн пуçлăхĕ М.М.Зайнуллин тата ытти регионсенчен килнĕ хăнасем ăшшăн саламларĕç.
Сабантуй спорт мероприятийĕсемпе те пуян пулчĕ. Физкультурăпа спорта юратакансем алă вăйне виçекенсене, кире пуканĕ çĕклекенсене те пăхса киленчĕç.
Тутар-пушкăрт наци мелĕпе кĕрешекенсем те хăйсен тавра куракансене нумай пухрĕç. Çак кĕрешĕвĕн тĕп судйи Раççейри тата республикăри нумай турнир чем-пионĕ Рашит Хамбиков пулчĕ. Сабантуйра Ильнур Гайнутдинов (Урмаел вăтам шкулĕ) чи ăста пулнине çирĕплетрĕ. Çавăн пекех Ильнар Зайнуллин, Азат Тукаев та хăйсен виçисенче ăсталăхне кăтартрĕç. Çĕнтерÿçĕсене Хисеп грамотисем, хаклă парнесем парса чысларĕç.
Майăн 29-мĕшĕнче Асанкасси ялĕнчи вăрман уçланкинче ĕçпе юрă тата спорт уявĕ пулнă. Пуçтарăннисене район пуçлăхĕн çумĕ, ял хуçалăх пайĕн начальникĕ Г.Киргизов, Асанкасси ял поселенийĕн пуçлăхĕ Н.Карпов, «Асаново» ЯХПК председателĕ А.Бахтеров саламланă. Автанла çапăçса Н.Миронов çĕнтернĕ. Ирĕклĕ майпа кĕрешсе В.Терентьев абсолютлă чемпион пулса тăнă. Волейбол вăййинче Асанкасси ял поселенийĕн команди мала тухнă.
Ял çыннисене юрă-ташăпа савăнтарнă, суту-илÿ точкисем ĕçленĕ.
Уяв вĕçĕнче пăсланса тăракан шÿрпе хуранĕ пурне те хăйĕн патне туртнă.