29 мая 2010 г.
Çу уйăхĕн 18-мĕшĕнче, Музей кунĕ пулнă май, шкул ачисемпе экскурсире пултăмăр. Паллă художникăн Николай Садюковăн ĕçĕсен куравне пăхма Шупашкар хулинче Калинин урамĕнче вырнаçнă художество музейĕнче пире хапăл туса кĕтсе илчĕç. Ку çеç те мар, тÿлевсĕр экскурси пулни те кăмăла çĕклерĕ.
Н.Садюков Тăван çĕр-шыв, тăван тавралăх, тăван ял темипе тунă ÿкерчĕксем умĕнче чылайччен чарăнса тăтăмăр. Вĕсене пăхнă май Константин Ивановăн «Нарспи» поэминчи «Шăнкăртатса шыв юхать çÿллĕ валак пуçĕнче...» йĕркесем аса килчĕç. Хальхи вăхăтра «валак» сăмаха çамрăксенчен чылайăшĕ ăнлансах та пĕтереймест. Художник хăй çуралса ÿснĕ Кавал ялĕнчи ĕç-пуçа сăнлани куç умне çакна пĕтĕмпех кăларса тăратрĕ. Унăн пултарулăхĕпе чылайччен килентĕмĕр.
Картлашкапа пĕрремĕш хута анса пынăçемĕн шкул ачисем вăрçă темипе тунă ĕçсене сăнарăм. Çакăнта тăп! чарăнса тăмалли сăлтав тупăнчĕ. Комсомольски районĕнчи Асанкасси ялĕнче пурăнакан Лена Салаева хушаматне курах кайрăм. Ман кÿршĕ, 8-мĕш класс хĕрачи, виççĕмĕш çул район центрĕнчи искусство шкулне ÿкерме çÿрет. Пăх та кур: ăсталăха епле ÿстернĕ! Паллах, кунта Надежда Владимировна Абдюшева тÿпи пысăк. Аслă Çĕнтерĕве халалланă республика конкурсĕнче Лена 3-мĕш вырăн йышăннă. Унăн «Тăшмансем ялта» ÿкерчĕкĕ чăннипех те чи лайăххисенчен пĕри.
Хĕпĕртерĕм, мăнаçлантăм ял хĕр ачишĕн. Унăн тăрăшулăхĕ ан иксĕлтĕр, пултарулăхĕ ÿссе пытăр. Тен, çулсем иртнĕçемĕн Л.Салаева та хăйĕн ĕçĕсен куравĕсене йĕркелĕ.
Сăрă ăстисем — çамрăккисем те, аслисем те — ыттисем курманнине асăрхаса пире яланах асамлăхĕпе тыткăнлаччăр.