26 мая 2010 г.
Районти тĕп библиотекăна 3 пине яхăн вулакан çÿрет. Кĕнекесемпе е хаçат-журналпа паллашма пулать кунта. Кунсăр пуçне тата ытти пулăшусем те паратпăр. Пĕр-пĕр информацие хăвăрт тупма пулăшатпăр. Хальхи вăхăтра та телевизор, компьютер чăн-чăн кĕнеке тусĕсене библиотекăран уйăрмаççĕ. Кĕнеке çынна ăслăрах, анлă тавракурăмлăрах пулма вĕрентет.
Шкул ачисем те вулавăшран тухма пĕлмеççĕ. Вĕрентекенсем панă ĕçсене пурнăçлас тесе кирлĕ литература илме, рефератсем çырма пирĕн патах килеççĕ. Акă Комсомольски 1-мĕш вăтам шулĕнчи А.Семенова, 2-мĕш вăтам шкулĕнчи А.Андреева, М.Хайртдинова пирĕн пата тăтăшах çÿреççĕ, пĕлĕвне ÿстереççĕ.
Районти тĕп больницăра ĕçлекен Н.Н.Михайлова, Т.А. Юманова, Э.Г.Галкина — библиотекăн çывăх тусĕсем. Вĕсем тĕрлĕ темăпа кĕнекесем илсе вулаççĕ.
Пирĕн кĕтнĕ хăнасем — пенсионерсем: Г.И.Сорокина, В.И. Емельянова, Н.И.Кокшин, П.В.Лапшин, Ф.К.Григорьева библиотекăна тĕрлĕ хаçат-журнал вулама çÿреççĕ, интереслĕ кĕнекесем ыйтаççĕ.
Эпир тăтăшах тĕрлĕ меро-приятисем йĕркелетпĕр. Пĕр уяв та кĕнеке выставкисĕр иртмест пулĕ. Кăçал уйрăмах паллă çул: Аслă Çĕнтерÿ пулнăранпа 65 çул çитрĕ, Чăваш Республикине туса хунăранпа 90 çул... Кунсăр пуçне 2010 çул Вĕрентекен çулталăкĕ те. Ăна халалласа «Учитель, имя гордое твое» кĕнеке выставки йĕркелерĕмĕр. Çырав-çăсем вĕрентекенсем пирки илемлĕ литература та чылай хайланă. Библиотекăра вĕрентекенсем çинчен çырнă пĕтĕм кĕнеке списокĕ те пур.
Тăван çĕр-шывăн Аслă вăрçинче çĕнтернĕренпе 65 çул çитнине халалласа вулавăшра «Великий май великой Победы» ятпа кĕнеке куравĕ хатĕрленĕ. Кунта хамăр районти, республикăри вăрçă паттăрĕсемпе, вĕсен кун-çулĕпе паллашма пулать.
Чăваш Республикин юбилейĕ пирки йĕркеленĕ «Чувашия — для будущего» кĕнеке выставки те интереслĕ. Унта хамăр республикăн аталанăвĕ пирки çырнă литературăна курма пулать.
Районти тĕп библиотека информаци, культура, вĕрентÿ тата ытти отрасльсен ыйтăвĕсемпе информаци паракан центр пулса тăчĕ. Пирĕн патра «Консультант-плюс» право системи вырнаçнă. Ун структурине республикăри информациллĕ центр та кĕрет.
Пирĕн пата килекенсене «Ваше право» кĕнекесен, дисксен выставки те хапăлласа кĕтет.
Библиотекăра юлашки вăхăтра пичетленнĕ кĕнекесемпе çеç мар, компакт-дисксемпе те, видеокассетăсемпе те паллашма пулать.
Кашни уйăхăн виççĕмĕш кĕçнерни кунĕнче районти вулавăшра консультаци пункчĕ ĕçлет. Унта халăха хумхантаракан ыйтусемпе район прокуратурин ĕçченĕсен, коммуналлă хуçалăхăн тата ытти организацисен представителĕсем район çыннисемпе тĕл пулаççĕ, ыйтусем çине тулли хурав параççĕ.
Пирĕн патра сире кирлĕ материал тупăнмасан, электронлă почтăпа усă курса республикăри наци библиотекинчен те илме май пур.
Районта 24 библиотека. Вĕсенчен çирĕмĕшĕнче интернет ĕçлет. Вулавăшсене икĕ пин ытла ача çÿрет. Районти тĕп библиотекăра И.Степанов, Т.Козлова, А.Иванова, Е.Зайцева, Н.Иванова, В.Степанов, А.Макарова, Е.Индюкова, А.Зинатуллина, Д.Замкова вĕренекенсем тăтăшах пулаççĕ. Пĕчĕккисем юмах-халап ву-лаççĕ пулсан, аслăраххисем вĕрентÿ программипе çыхăннă литературăна килĕштереççĕ. Ачасемпе тĕрлĕ тематикăпа мероприятисем йĕркелетпĕр.
Сăвăçсемпе çыравçăсен юбилейĕсем тĕлне буклетсем те хатĕрлетпĕр. Акă Г.Чаржов поэт 70 çул тултарнă ятпа «Талант поэта» буклет турăмăр. К.Турхан çуралнăранпа кăçал 95 çул çитет. Ун юбилейне те хатĕрленетпĕр.
Килĕр вулавăша, унăн алăкĕ сирĕншĕн яланах уçă. Районти библиотекăсенче пултаруллă, хăйсен ĕçне пĕлсе тăвакан çынсем тăрăшаççĕ. Вĕсем сирĕн ыйтăвăрсене туллин тивĕçтерĕç.
Акă Хырай Ĕнелĕнчи А.А. Грибоедова, Комсомольскинчи В.Т.Яковлева, А.А.Зайцева, Г.Ф.Тяканова, Йÿç Шăхалĕнчи А.Н.Герасимова, Шурутри В.Е. Викторова, Хирти Выçлири А.М. Казакова, Аслă Чурачăкри О.М. Иванова чылай çул библиотека системинче вăй хунă, ырă ята тивĕçнĕ. Халĕ ĕçлекенсем те тăрăшуллă. Сăмахран, Тукай ял библиотеки (ертÿçи В.П.Толокнова) кăçалхи çул чи лайăххи ята тивĕçнĕ.
Библиотека ĕçченĕсене уяв ячĕпе саламлатпăр, малашне те вулакансен ыйтăвĕсене туллин тивĕçтерме вăй-хал сунатпăр.