22 мая 2010 г.
Майăн 19-мĕшĕнче республикăра Пĕрлехи информаци кунĕ иртрĕ. Унăн теми — Чăваш Республикин бюджет политикин тĕп çул-йĕрĕ, Чăваш автономине туса хунăранпа 90 çул çитнĕ май Республика кунне хатĕрленесси епле пынине тишкересси. Учрежденисемпе организацисенче республикăра, районта тухса тăракан хаçат-журнала мĕнле çырăнни çине те тимлĕх уйăрчĕç. Комсомольски районне Чăваш Республикин культура, национальноçсен ĕçĕсен, информаци политикин тата архив ĕçĕн министрĕ Роза Лизакова ертсе пыракан ушкăн килсе çитрĕ. Р.Лизакова, ЧР Патшалăх Канашĕн депутачĕсем В.Филимоновпа К.Мифтахутдинов, Наци библиотекин директорĕ С.Старикова пирваях район пуçлăхĕн пÿлĕмĕнче ĕçлĕ канашлу ирттерчĕç. Геннадий Федорович районăн социаллă-экономикăллă пурнăçĕ çинче чарăнса тăчĕ.
Информаци кунĕнче ĕçлĕ ушкăнсем Тукай, Шурут, Чĕчкен, Хырхĕрри тата Асанкасси ял поселенийĕсене çитсе курчĕç.
Роза Лизаковăпа Геннадий Волков Шурут ял поселенийĕнчи хĕрарăмсен Иверски Турă амăшĕн иконĕн мăнастирĕнче тата вăтам шкулта пулса курчĕç. Ялта уйрăм культура çурчĕ пулманнипе темиçе çул каялла шкулта вĕрентÿпе культура центрĕ туса хунă. Ял библиотеки те кунтах вырнаçнă. Шкул тата центр ĕçĕ-хĕлĕпе ял поселенийĕн пуçлăхĕ Ананий Алексеев, Татьяна Колпакова директор тата Галина Архипова заведующи паллаштарчĕç. Малтан кунта акт залĕ пулнă. 2009 çулта юсав ĕçĕсем ирттерсе маччана, стенасене çĕнĕ сăн кĕртнĕ. Концертсем, дискотекăсем, кану каçĕсем те унтах иртеççĕ. Библиотекăна чăвашла куçарнă Библи çитме те ĕлкĕрнĕ иккен.
Г.Волковпа Р.Лизакова зала пухăннă культура ĕçченĕсемпе Информаци кунĕн темипе пулса пыракан ĕçсене сÿтсе яврĕç, вĕсен ыйтăвĕсене хуравларĕç.
Пĕрлехи информаци кунĕнчи иккĕмĕш ĕçлĕ ушкăна Чăваш Республикин Патшалăх Канашĕн депутачĕ, «Чăвашрегионгаз» ООО генеральнăй директорĕ Кияметдин Мифтахутдинов ертсе пычĕ. Депутатпа район пуçлăхĕн çумĕ, ял хуçалăх пайĕн начальникĕ Георгий Киргизов Хырхĕрри ял поселенийĕн территорине çул тытрĕç. Çула май районти газ участокне те çитсе курма кăмăл турĕ Кияметдин Садртдинович. Газ участокĕн начальникĕн ĕçĕсене туса пыраканĕ В.А.Чернов, аварипе диспетчер службин мастерĕ М.М.Гибатдинов хăйсен ĕçĕ-хĕлĕпе паллаштарчĕç, тĕллевсене тишкерчĕç.
Ĕçлĕ ушкăн «Восток» ял хуçалăх кооперативĕнче пулчĕ, унта машинăпа трактор паркĕнче, сĕт-çу ферминче ĕçлекенсемпе курса калаçрĕ, вĕсен ыйтăвĕсем çине хуравларĕ. В.Г.Михеев председатель тата С.Г. Катиков тĕп зоотехник килнĕ хăнасене малашне тума палăртнă ĕçсемпе паллаштарчĕç.
Кăнтăрла иртсен ушкăнсем район пуçлăхĕн Г.Ф.Волковăн кабинетĕнче пухăнса ĕçсене пĕтĕмлетрĕç.