19 мая 2010 г.
Тĕнче хитрелĕх çинче тытăнса тăрать, тенĕччĕ пĕр паллă çын. Чăнах та çапла пулĕ. Кам йĕри-таврари илемлĕхе сăнама пĕлет, вăл пурнăçра хăйне лăпкăрах тытать, кăмăл-сипет енчен те ырă, çитĕнÿсем те тăвать.
Çакна шута илсе Комсомольски 1-мĕш вăтам шкулĕнче сăн ÿкерчĕксен выставкине йĕркелерĕç. Унăн ячĕ — «Мое родное село» — «Ытарайми Каçал ен». 2—10-мĕш классенче вĕренекен ачасем Каçал тăрăхне, Кĕтнене, чĕр чун тĕнчине ÿкернĕ сăн ÿкерчĕксем тăратрĕç. Унта пурĕ 46 ĕç пулчĕ. Вĕсем пурте 1х4 форматпа, рамка ăшĕнче.
Выставкăна 1-мĕш хутра йĕркелерĕç. Унта хăйне евĕр ĕçсем пур. Акă, Катя Свинина Кĕтнере пăр кайнине, Рома Воробьев хĕллехи ире ÿкернĕ, Катя Атласкина кушакпа пулла, Маша Смирнова кушака сăнлани уйрăмах интереслĕ. Выставкăра татах та килĕшÿллĕ сăн ÿкерчĕксем пур. Кĕтне юхан шывне сăнланисем çеç сакăр ĕç. Пурте вĕсем килĕшÿллĕ, чуна тыткăнлаççĕ.
Вулакансене выставкăна килсе курма сĕнетпĕр. Сăн ÿкерчĕксем сирĕн кăмăла каясса шанатпăр.
Источник: "Каçал Ен"