15 мая 2010 г.
Е.Н.Тумаков Тăманлă Выçли ялĕнче пурăнать. Евгений Николаевич – слесарь. Вăл хăйĕн ĕçне питĕ юратать. Унпа «Пайгас» колхозра ĕçлекенсем те питĕ кăмăллă. Мĕншĕн тесен вăл яланах кирек мĕнле ĕçе те вăхăтра та правур пурнăçлама юратать. Евгений Николаевич хăйне шанса панă ĕçе яланах тирпейлĕ тăвать. Çамрăксем те унран тĕслĕх илеççĕ. Сĕнÿ-канаш та ыйтаççĕ.
Е.Тумаков унччен тăван колхозра сварщикре те, водительте те нумай çул ĕçленĕ.
«Эпĕ чапа тухассишĕн тăрăшмастăп. Ĕç вăл пире çынлăха упрама пулăшать. Ĕç çукки чылай яш-кĕрĕме пĕтерет. Нумайăшĕ ĕçке ерет, туртать тата ытти киревсĕр япаласем те тăвать. Çамрăксен хăйсен аллипе телее туптама вĕренмелле»,— пĕлтерчĕ мана шухăш-кăмăлне ял хуçалăх кооперативĕн ĕçченĕ.
Евгений Николаевич маттур та пултаруллă хĕрпе, Елена Вениаминовнăпа, çемье çавăрнă. Мăшăрĕ те правур та тарават хĕрарăм.
Тумаковсем тăватă ача çуратса ÿстернĕ. Пурнăç çулĕ çине кăларнă. Паянхи кун вĕсем çĕр-шывăн тĕрлĕ хулисенче пурăнаççĕ.