12 мая 2010 г.
Аслă Çĕнтерÿ 65 çул çитнине халалласа пирĕн районта «Çĕнтерÿ салючĕ» фестиваль иртрĕ. Унта ял поселенийĕсен пултарулăх ушкăнĕсем куракансене нумай-нумай юрăпа, сăвăпа, ташăпа савăнтарчĕç. Ултă уйăха тăсăлнă мероприяти майăн 7-мĕшĕнче районти культурăпа кану центрĕнче гала-концерт йĕркеленипе вĕçленчĕ. Художество пултарулăх ушкăнĕсем, уйрăм солистсем чи чаплă номерсемпе савăнтарчĕç.
Малтанах сцена çине тухса район пуçлăхĕ Г.Ф.Волков çĕнтерÿçĕсене Хисеп грамотисем парса чысларĕ. Пĕрремĕш вырăна Элпуç ял поселенийĕн артисчĕсем тивĕçнĕ. Хирти Сĕнтĕр тата Урмаел ял поселенийĕн пултарулăх коллективĕсем – иккĕмĕшсем. Виççĕмĕш вырăна александровкăсемпе хырхĕррисем йышăннă. Çавăн пекех «Чи лайăх конферансье» ята тивĕçнĕ Н.Розовăпа (Элпуç) Г.Белкова (Хырхĕрри) та район пуçлăхĕн Хисеп грамотине илме тивĕç пулчĕç.
Концерт программине халăх вокал ансамблĕ (ертÿçи А.Кокшина) «Даль великая» юрăпа пуçларĕ. Гала-концерта компетентлă жюри Аслă Чурачăк, Урмаел, Александровка, Хирти Мăнтăр, Элпуç, Асанкасси, Аслă Çĕрпÿел ял поселенийĕсен коллективĕсен пĕршер-икшер чи лайăх номерĕсене суйласа илнĕ. Петр Бариновпа Радий Басников юрланă «Ехал я из Берлина» тата «Самоволочка» юрăсем куракансене килĕшрĕç. Культурăпа кану центрĕн халăх театрĕ кăтартнă «Пирĕн геройсем» ятлă сценка та уява пухăннисен кăмăлĕсене тыткăнларĕ.
Источник: "Каçал Ен"