12 мая 2010 г.
1418 кунпа çĕр тăсăлнă Тăван çĕр-шывăн Аслă вăрçи кашни киле хуйхă-суйхă илсе килнĕ. Апла пулин те чунĕпе çирĕп, паттăр, хастар совет салтакĕсем çĕнтерĕве çапăçу хирĕсенче те, тылра та юнпа тата тарпа çывхартнă. Хăрушă вăрçă мĕн чухлĕ çутă ĕмĕте татнă! Мирлĕ пурнăçа хÿтĕлесе пуç хунисем нихăçан та асăмăртан тухмĕç.
Кăçалхи майăн 9-мĕшĕ хĕвеллĕ те ăшă кун пулчĕ. Аслă Çĕнтерÿ 65 çул çитнине уявлама район центрĕнчи çĕнтерÿçĕ-салтак палăкĕ умне вăрçă ветеранĕсемпе тыл ĕçченĕсем, шкул ачисем, предприятисемпе организацисенче вăй хуракансем, хăнасем пуçтарăнчĕç. Мероприятие вăрçă ветеранĕсене УАЗ маркăллă машинăсемпе асăну палăкĕ умне çити илсе çитерни те хăйне евĕрлĕ илем кÿчĕ.
Уява район пуçлăхĕ Г.Ф.Волков уçрĕ. «Эсир вăрçă çулĕсенче пур йывăрлăхпа синкере чăтса ирттернĕ, хаяр тытăçусенче çĕнтернĕ, уй-хирте ĕçленĕ, ял хуçалăхне ура çине тăратнă тата ытти ĕçсенче те вăй хунă — кĕскен каласан Аслă Çĕнтерĕве çывхартса мĕн кирлине йăлтах тунă. Паянхи тăнăçлă пурнăçшăн, хисеплĕ ветерансем, тав тăватпăр»,— терĕ Геннадий Федорович, пурне те уявпа саламласа. Çавăн пекех пухăннисене афганецсен районти совечĕн председателĕ В.Н.Гаврилов тата республикăри çар комиссариачĕн Комсомольскипе Елчĕк районĕсен уйрăмĕн начальникĕ А.А.Маурин саламларĕç, ырлăх-сывлăх сунчĕç.
Малалла çамрăк армеецсен парачĕ пулчĕ. Чи малтанах ветерансен умĕнче Афган тата Чечен вăрçисенче хăйсен тивĕçĕсене пурнăçланисем, вĕсем хыççăн шкул ачисем мăнаçлă туйăмпа çирĕппĕн утса иртрĕç. Тумĕсем те кăмăла каймалла, строй юррисене те аван пĕлеççĕ.
Ун хыççăн район пуçлăхĕ, организацисемпе предприятисенче ĕçлекенсем вăрçăра пуç хунă паттăрсене сума суса палăк умне чечек кăшăлĕсем хучĕç.
Каярахпа уявра районти тĕрлĕ ял поселенийĕсенчен килнĕ артистсем вăрçă темипе, паянхи мирлĕ пурнăçпа çыхăннă юрă-ташăпа кăмăл-туйăма хускатрĕç.
Çĕнтерÿ пирĕншĕн мĕн тери пĕлтерĕшлĕ пулни каламасăрах паллă. Çавăнпа та ĕнтĕ пурте çак куна уявсен уявĕ пулнине чунпа туйса савăнчĕç.
Уяв программине Новелла Розовăпа Валерий Гаврилов кăмăллă ертсе пычĕç.
Районти тĕп библиотека умĕнче Çĕнтерÿ кунне халалласа «Войны священные страницы» темăпа мероприяти иртрĕ. Библиотека ĕçченĕсем вăрçă кунĕсене халалланă кĕнекесен тата ÿкерчĕксен выставкисене йĕркеленĕ. Шăпăрлансем те асфальт çинче ÿкерсе «Пусть всегда будет мир!» конкурса хутшăнма пултарчĕç.
Çак кун Комсомольски тĕп стадионĕнче те палăртнă вăхăта спорта тата физкультурăна кăмăллакансем, футбола юратакансем пухăнчĕç. Аслă Çĕнтерĕве халалланă мероприятие 16 команда хутшăнчĕ. Вĕсен ăмăртăвне пăхса тăма та кăсăклăччĕ. Блиц-турнирта кубока Патăрьелĕнчен килнĕ «Темп» команда спортсменĕсем çĕнсе илчĕç. Иккĕмĕшпе виççĕмĕш вырăнсене нĕркеçсемпе асанкассисем тухрĕç. Çĕнтерÿçĕсене Хисеп грамотисем, хаклă парнесем парса чысларĕç.
Аслă Çĕнтерÿ çутине ĕмĕр-ĕмĕр упрасчĕ!
Çитĕнекен ăрăва, пирĕн пуласлăха, патриотсен тата паттăрсен тĕслĕхĕ çинче мирлĕ пурнăçа сыхласа хăварма вĕрентесчĕ.
Хаяр вăрçă кунĕсенчи синкерлĕ пулăмсем хыççăн вăхăт мĕн чухлĕ ытларах иртет, ирĕклĕх уявне пирĕн çавăн чухлĕ лайăхрах ирттересчĕ.
Источник: "Каçал Ен"