05 мая 2010 г.
Çак кунсенче Комсомольскинчи 2-мĕш вăтам шкулти 10-мĕш «а» класс ачисем Мускавран таврăнчĕç. Вĕсене унта Раççей Федерацийĕн Патшалăх Думин депутачĕ Павел Владимирович Семенов йыхравланă. Вăл пуçарнипе Комсомольски районĕнче чи маттур класа палăртас тĕллевпе «Суперкласс!» конкурс ирттернĕ. Конкурсăн тĕп парнине вара шăпах пирĕн класс çĕнсе илчĕ. Чăннипех те пултаруллă ачасем вĕренеççĕ çак класра. Вĕренÿре те, спортра та палăрса тăраççĕ вуннă-мĕшсем. Шкулта, районта иртекен пур мероприятисене те хастар хутшăнаççĕ. Анастасия Антонова — районти, республикăри олимпиадăсен çĕнтерÿçи. Республикăра обществознани предмечĕпе кăçал пĕрремĕш вырăн йышăнса пĕтĕм Раççейри шкул ачисем хушшинчи олимпиадăра Чăваш Ен чысне хÿтĕлерĕ. Смоленск хулинчен тăваттăмĕш вырăнпа таврăнчĕ. Анастасия — Чăваш Республикин Президенчĕн стипендиачĕ. Анастасия Андреева вара сăрă ăсти. 2009 çулта Настя республика шайĕнче иртнĕ «Туслăх хĕлхемĕ» фестивальте «Шевле» номинацинче çĕнтерсе Артека кайма тивĕç пулчĕ. Сергей Васильев, Дмитрий Краснов, Алексей Родионов, Ирина Алексеева, Татьяна Долгова, Анастасия Павлова тĕрлĕ спорт мероприятийĕсенче шкул чысне хÿтĕлеççĕ. Вĕренÿре те маттур ачасем. Анастасия Антонова, Анастасия Андреева, Сергей Васильев, Анна Борисова, Юлия Чернова «пиллĕк» паллăсемпе çеç вĕренеççĕ. Наталия Алексеева, Ирина Андреева, Кантай Ахметова, Анастасия Павлова, Светлана Семенова, Найле Султанова та «4» тата «5» паллăсемпе ĕлкĕрсе пыраççĕ.
Мускава кайиччен вара нумай тăрăшрĕç ачасем. Конкурса хатĕрленнĕ май кунне-çĕрне пăхмасăр стена хаçачĕ, презентаци, сценарисем хатĕрлерĕç. Тăрăшни сая каймарĕ. Мускав ачасене ăмăр çанталăкпа кĕтсе илчĕ пулин те вĕсен кăмăлне хуçаймарĕ. Çул çÿрев София çыранĕнчен пуçланчĕ. Христос Çăлавçă храмĕнче, Воробьево тăвĕсем çинче, Хĕрлĕ тÿремре, Хĕç-пăшал палатинче тата ытти паллă вырăнсенче пулса курчĕç. Хĕрлĕ тÿремре Мускав çынни пулнине ĕнентерекен ятарлă Диплома парса чысларĕç ачасене. Çавăн пекех РФ Патшалăх Думинче Павел Владимирович Семеновпа тĕл пулни, депутатсем ларăва пухăнакан зала кĕрсе курни хавхалану кÿчĕ. Çул çÿрев ачасене малашне те пысăк çитĕнÿсем патне ăнтăлма вăй-хăват парса тăрĕ.