05 мая 2010 г.
Ватă çынсене, вăрçă участникĕсене пулăшасси – çамрăк ăрăвăн тивĕçĕ. Дубовка ялĕнче ветерансенчен С.К.Совин кăна сывă. Сергей Кириллович 83-ре. Вăсем мăшăрĕпе, Елена Сергеевнăпа, иккĕшех пурăнаççĕ. Е.С.Совина шкулта вырăс чĕлхипе литературине вĕрентнĕ, педагогика ĕçĕн ветеранĕ. Совинсем 3 ывăл пăхса çитĕнтернĕ. Ачисем пурте аслă пĕлÿллĕ.
Канмалли кун Павел Семенов, Вася Павлов, Маша Павлова тата Таня Иванова вĕсем патне пулăшма кайрăмăр. Сад пахчинче ĕçлерĕмĕр, çурт умне шăлса тасатрăмăр. Пире Н.Г.Боровкова вĕрентекен ертсе пычĕ. Ĕç хыççăн Сергей Кириллович вăрçă çулĕсем пирки каласа пачĕ, сăн ÿкерчĕксем те кăтартрĕ. Çăмăл мар ăна иртнине аса илме. С.К.Совин вăрçа 17-ре тухса кайнă. Карели тăрăхĕнче çыхăну ĕçне йĕркеленĕ. Тăшмана парăнтарнă хыççăн вĕсен чаçĕ Инçет Хĕвел тухăçне куçать. Кăнтăр Сахалина, Курил утравĕсене Япони самурайĕсенчен ирĕке кăларнă çĕре хутшăнать. Унăн кăкăрне Аслă Отечественнăй вăрçăн II степеньлĕ орденĕпе медальсем илемлетеççĕ.
1952 çулта тăван яла таврăнсан тĕрлĕ ĕçре вăй хурать. Комсомол райкомĕнче тăрăшать, колхоз председателĕ те пулать. Комсомольскинчи çул-йĕр участокĕнче 27 çул ĕçленĕ. Сергей Кириллович хастар сунарçă та пулнă. Вĕсен килĕнче музейри пекех. Тĕрлĕ вĕçен кайăксен, чĕр чунсен макечĕсене курма пулать.