05 мая 2010 г.
Акă, апрелĕн 29-мĕшĕнче районти культурăпа куну центрĕнче Т.Е.Иванова ертсе пыракан «Островок» ташă ушкăнне туса хунăранпа 10 çул çитнине уявларĕç. Çамрăк ташăçăсене район пуçлăхĕ Г.Ф.Волков, искусство шкулĕн директорĕ Ф.А.Гибатдинов, ашшĕ-амăшĕсем тата ытти хăнасем те ăшă сăмахсемпе саламларĕç, парнесем пачĕç.
— «Островок» ташă ушкăнĕ тĕрлĕ çĕрте пултарулăхне тивĕçлĕ шайра кăтартнă, кăтартать те. Ăна хăйĕн ĕçне чунтан парăннă педагог ертсе пыни те малашлăха шанчăкпа пăхма май парать,— терĕ Геннадий Федорович ăнăçу сунса.
Коллектив мĕнле кăна фестиваль-конкурссене хутшăнман пулĕ; Çак кĕске вăхăтра нумай-нумай регионта хăйсен маттурлăхне кăтартса çĕнтерÿçĕ ята çĕнсе илнĕ. Çамрăк талантсене ÿсĕм çулĕпе ертсе пынăшăн Т.Е.Иванова темиçе хутчен те Культура Министерствин, район пуçлăхĕн Г.Ф.Волковăн Хисеп грамотипе Тав хутне тивĕçнĕ. «Островок» ташă ушкăнĕн çитĕнĕвĕсем пирки вĕçĕ-хĕррисĕр çырса кăтартма пулать. Унăн репертуарĕ вырăс, чăваш, тутар, узбек тата ытти халăхсен ташшисемпе пуян. Сăмахран, иртнĕ кунсенче тĕп хуламăрта иртнĕ республикăри IV фестивале хутшăнса «Танцевальное творчество» номинацире I степеньлĕ лауреат ятне çĕнсе илнĕ. Ташă ушкăнĕн ертÿçине Татьяна Ивановăна та Чăваш Республикин Культура, национальноçсен ĕçĕсен, информаци политикин тата архив ĕçĕн министерствин Тав хутне парса чысланă.
Кану каçĕнче çамрăк артистсем куракансене 3 сехете яхăн савăк кăмăл парнелерĕç. «Калейдоскоп» ушкăн (ертÿçи – Л.Н.Григорьева ) кăтартнă ташăсем хыççăн та куракансем тăвăллăн алă çупса тав турĕç. Шел, арçын ачасенчен икĕ ташă ушкăнĕнче те пĕртен-пĕр Саша Соловьевăн пултарулăхĕпе киленме май пулчĕ. Районта талантлă арçын ачасем тек çук-шим;
Çавăн пекех Ольга Буслаевăпа Радий Басников шăрантарнă юрăсем те куракансен чĕрисене тыткăнларĕç.
Уява пухăннисем Алена Ефремовăпа Екатерина Баранова ăсталанă ташăсене курса киленчĕç.
Хĕрлĕ Чутайри ачасен искусство шкулĕ çумĕнчи «Святая Русь» вокал ансамблĕн участникĕ Хан Реда килсе çитни уява хăйне евĕрлĕ илем кÿчĕ. Аякри хăна Ираида Владимировна Спиридоновăна чĕререн тав турĕ. Сăмах май, Ирина матушка халĕ районти искусство шкулĕнче тăрăшать.
Уяв программине районти вĕрентÿ пайĕн аслă методисчĕ Т.В.Долгова кăмăллă ертсе пычĕ.
Юлашкинчен кăçал хореографи уйрăмĕнчен вĕренсе тухнă ташăçăсене Хисеп грамотисем парса чысларĕç. Вĕсем: Карина Долгова, Екатерина Баранова, Инга Кондратьева, Алена Ефремова, Ирина Пыркина, Татьяна Козлова, Лилия Шакурова, Оксана Карсакова.
Концерта пăхса пуçа çакăн пек шухăш кĕчĕ: ăнăçлăхĕ мĕнре-ши «Островок» ташă ушкăнĕн. Çитĕнĕвĕн тупсăмĕ, ман шутпа, чуна çывăх ташăсем кăтартнинче, халăха çывăх пулнинче.