28 апреля 2010 г.
Вăрçă пуçлансанах Асанкассинче пурăнакан Михаил Филиппович Салаевăн виçĕ ывăлне: Григорие, Кузьмана, Дениса фронта илсе каяççĕ. Денис çула тухиччен пĕчĕк хĕрне, Альăна, йăтса алăкăн-тĕпелĕн утса çÿренĕ. Юратнă хĕрĕпе ĕмĕрлĕхех уйрăлнине чунĕ сиснĕ-ши?
Денис Салаев, гварди лейтенанчĕ, стрелковăй взвод командирĕ пулнă. 1944 çулта Мускава хÿтĕленĕ чухне хаяр çапăçура пуçне хунă. Михаил Филиппович ывăлĕсене çапăçу хирĕнчен кĕтсе илеймен. Вăрçă чарăнсан хăй те çĕре кĕрет. Вĕсен халĕ кил-çурт йĕрĕ те çук. Анчах кукаçи лартса хăварнă хыр паян та кашласа ларать. Денис Михайлович хаяр çапăçура паттăррăн вилнĕ пулсан та, унăн хушамачĕ палăк çинче те, çар комиссариатĕнчи стенд çинче те çук. 1985 çулта Оборона министерствине çыру çырнăччĕ. Вĕсем мана Денис Салаева Калинин облаçĕнчи Скураты ялĕ çывăхĕнче пытарнине пĕлтерчĕç. Çар комиссариатĕнче те, Асанкасси ял администрацийĕнче те унăн хушаматне малашне асăнаççех тесе шанас килет.
Салаевсен йăхĕнчен нумайăшĕ Аслă Отечественнăй вăрçăра пуçне хунă. Пĕр Максим Осипович çеç çĕнтерÿпе таврăннă. Вăл чылай çул педагогра тăрăшнă. Ывăлĕ Вячеслав та унăн çулĕпе утнă. Вĕсем мăшăрĕпе, Тамара Васильевнăпа, ачасене вĕрентес ĕçре тăрăшаççĕ.
Вăрçăран таврăнайман ентешсене манас марччĕ, вĕсене яланах асра тытар.