28 апреля 2010 г.
Ака уйăхĕн 25-мĕшĕ — Чăваш чĕлхи кунĕ. Ăна халалласа Комсомольски 1-мĕш вăтам шкулĕнчи 8-мĕш «а» класс ачисемпе районти тĕп библиотекăра «Тăван чĕлхем — сÿнми хĕлхем» ятлă мероприяти иртрĕ. Çак кун чăваш халăхĕшĕн нумай-нумай пархатарлă ĕç тунă, чăвашсене çутта кăларас енĕпе ĕçленĕ И.Я.Яковлев çуралнипе те çыхăннă. Вăл чăваш çырулăхне халăх хушшинче сарнă. Ятарлă шкул уçса учительсем хатĕрленĕ. Унтан поэтсем те, ăсчахсем те, учительсем те чылай тухнă. Чи малтанах библиотека ĕçченĕсем В.Боровковăпа А.Волкова чăваш чĕлхи тата И.Я.Яковлев пурнăçĕпе ĕçĕ-хĕлĕ çинче чарăнса тăчĕç. Ачасем тăван чĕлхе çинчен сăвăсем вуларĕç.
Часах Чăваш Республикин 90 çулхи юбилейне паллă тăвĕç. Çавна шута илсе районти тĕп библиотекăри ĕçченсем тăван ен çинчен викторина ирттерчĕç. Ыйтусем çине ачасем тулли хуравсем пачĕç. Библиотекăра «Тăван чĕлхем— сÿнми хĕлхем» кĕнеке выставки йĕркеленĕ. Унта — И.Я.Яковлев тата чăваш чĕлхи пирки калакан кĕнекесемпе журналсем.
Комсомольски 1-мĕш вăтам шкулĕнчи 8-мĕш «а» класс ачисем чăваш чĕлхине юратса вĕреннине çирĕплетсе пачĕç. Тăван сăмах хăватне ĕненсе вĕсем малашлăха ăнтăлĕç.