28 апреля 2010 г.
К.С.Мифтахутдинов — Комсомольскипе Елчĕк районĕсенчен Чăваш Республикин Патшалăх Канашне суйланнă депутат. Вăл кашни уйăхăн юлашки шăмат кунĕнчех райцентрта йышăну ирттерет. Хăй ерçеймен чухне депутат пулăшуçи Илдус Миннетуллин йышăну йĕркелет. Акă апрелĕн 24 -мĕшĕнче те Кияметдин Садыртдинович общество йышăну пÿлĕмĕнче граждансемпе тĕл пулчĕ. Çак кун унта 14 çын килчĕ. Кашнинех мĕнле те пулин ыйту-нуша илсе çитернĕ депутат патне. Пĕрин ачине е тăванне ĕçе вырнаçтармалла, художество пултарулăх коллективĕсен ертÿçисен те концертпа инçе çула тухмалла чухне пулăшу ыйтма тивет. Чернов урамĕ — Комсомольски ялĕнчи çĕнĕ урам. Унти çуртсенче çынсем пурăнма пуçлани виççĕмĕш çул çине те кайрĕ. Анчах вĕсем патне «сенкер çулăм» çитеймен-ха. Çак нушапа «Чăвашрегионгаз» ертÿçи патне пулмасан тата ăçта кайăн?
Суйлавçăсен, хăй патне пыракансен пĕр ыйтăвне те тимлĕхсĕр хăвармасть депутат. Май пур таран пулăшма, вăл е ку ыйтăва татса пама тăрăшать. Ĕç шыракан ентешсене Шупашкар хулинчи предприятисене е учрежденисене вырнаçма пулăшать. Уйрăм çынсен çеç мар, район интересĕсене те республика шайĕнче хÿтĕлет К.Мифтахутдинов. Çулталăк вĕçлениччен Чернов урамне газификацилеме те май тупасшăн.