24 апреля 2010 г.
Иртнĕ вырсарникун, апрелĕн 18-мĕшĕнче, Комсомольски вăрман уçланкинче çăмăл атлетикăна кăмăллакансем çуллахи спорт сезонне уçрĕç.
Çак кун çанталăк уяр та лăпкă тăчĕ. Чи малтанах ăмăртăва хутшăнакансене саламласа район пуçлăхĕ Г.Ф.Волков, район администрацийĕн вĕрентÿ пайĕн начальникĕ Н.А. Максимов, райадминистрацин спортпа тата физкультура енĕпе ĕçлекен тĕп специалисчĕ Е.А.Тихонов сăмах тухса каларĕç, спортсменсене ăнăçу сунчĕç.
Мероприятире физкультурăпа спорта юратакан шкул ачисем эстафетăра чупса хăйсен вăр-варлăхне кăтартрĕç. Пĕр япала пăшăрхантарать: аслисем çамрăксене тĕслĕх кăтартаймарĕç. Вĕсем ăмăртăва пурĕ те икĕ команда – Александровка (пуçлăхĕ В.Ф.Волков) тата Чĕчкен (пуçлăхĕ Ю.Г.Лукиянов) ял поселенийĕсен командисене тăратрĕç. Чăннипе каласан, районта нумай спорт мероприятийĕ вĕренекенсене пула кăна иртет. Енчен те, хăш-пĕр пуçлăхсенчен тĕслĕх илсе, пĕр шкул та команда тăратман пулсан;...
Пирваях старта пĕтĕмĕшле пĕлÿ паракан шкулсенче вĕренекенсем тухрĕç. Çак ушкăнри хĕр ачасем 500 метра чупрĕç. И.Андреева (Анат Тимĕрчкасси) пĕрремĕш, М.Алякина (Хирти Мăнтăр) иккĕмĕш, У.Данилова (Анат Тимĕрчкасси) виççĕмĕш вырăнсене тухрĕç. Арçын ачасем 1000 метрлă дистанцире ăмăртрĕç.Пĕрремĕшпе иккĕмĕш вырăнсене Д.Гайнулловпа (Чĕчкен) А.Смирнов (Хирти Мăнтăр) çĕнсе илчĕç. Д.Шишкалов (Çĕнĕ Мăрат) виççĕмĕш результат кăтартрĕ.
Вăтам шкулсенче вĕренекенсем хушшинче иртнĕ хĕрÿ тупăшу та куракансене хавхалантарчĕ. Çак ушкăнри хĕр ачасенчен Н.Горшкова (Çĕнĕ Мăрат), арçын ачасенчен Р.Мулгачев (Шурут) чи маттуррисем пулчĕç.
Пĕтĕмĕшле пĕлÿ паракан шкулсенчен чĕчкенсем пĕрремĕш, хиртиявăшсем иккĕмĕш, анаттимĕрчкассисем виççĕмĕш вырăнсене тухрĕç. Вăтам шкулсенчен вара нĕркеçсене (пĕрремĕш), аслăчурачăксене (иккĕмĕш) тата çĕнĕмăратсене (виççĕмĕшсем) çитекеннисем пулмарĕç. Аслăраххисенчен Таня Ванюркинапа Сергей Мухин палăртнă дистанцине чупса лайăх кăтартусемпе савăнтарчĕç.
Эстафетăра çĕнĕ çĕнтерÿ-çĕсен ячĕсене палăртни чăннипех те аван. Иртнĕ ăмăртура вара çавăн пек тĕслĕх – Руслан Мулгачев. Вăл Йÿç Шăхалĕнче çуралса ÿснĕ. Патăрьел районĕнчи Аслă Арапуç вăтам шкулĕнче вĕреннĕ. Халĕ вара, иккĕмĕш çур çултан — Шурут вăтам шкулĕн 10-мĕш класс вĕренекенĕ. Çамрăк спортсмен 3000 метрлă дистанцире чупса тантăшĕсене хыçала хăварчĕ. Мĕнех, эпир ăна республика шайĕнче район чысне хÿтĕлеме ăнăçу сунатпăр.
Источник: "Каçал Ен"