17 апреля 2010 г.
Театр — мĕн чухлĕ асамлăх санра! Кунта артистсемпе пĕрле савăнатăн, кулатăн, куççулленетĕн.
Районти халăх театрĕ хăйĕн ырă, сумлă ятне çухатман. Вăл, унчченхи пекех, куракансене çĕнĕ спектакльсемпе савăнтарать. Пĕлтĕр халăх театрне Валентина Харитоновна Зайцева, театра пуçарса яракан, ятне пачĕç. Кăçал вĕсем сцена çине премьерăпа тухрĕç.
Куракансене Николай Угаринăн «Улькка кинĕн виçĕ кинĕ» комедийĕпе савăнтарчĕç. Спектакле залра ларакансем хапăлласах кĕтсе илчĕç. Улькка кинемей пĕр вăхăтрах ывăлне виçĕ хутчен авлантарма май тупать. Ывăлĕ, Миша, амăшне итлет тата. Кинемей пĕр кинĕ ытла ĕçчен пулнинчен, тепри наянран тарăхать. Çавăнпах вĕсене шутласа тăмасăрах кăларса ярать. Виççĕмĕш кинне укçа-тенкĕне хапсăнса суйласа илет. Шел те, вăл суя сăмах çеç пулнă иккен. Еплерех кин çакланать ăна?! «Ман йĕри-тавра ташласа çеç çÿрĕн эсĕ, хуняма»,— тет качча килсенех Люба. Улькка пĕрремĕш киннех аса илет, ырлать, анчах чавса çывăх та çыртма çук иккен. Пурнăçран илнĕ ÿкерчĕке артистсем ĕненмелле, чуна пырса тивмелле выляса пачĕç. Çакна спектакль хыççăн куракансем тăвăллăн алă çупни те, сÿтсе явни те çирĕплетет.
Комедири рольсене Валентина Курицына (Улькка кинемей), Владимир Павлов (Миша), Валентина Тимофеева (Надя), Юлия Федорова (Люба), Оля Карсакова (Марук), Владимир Григорьев (Мăкăль), Лариса Носова (Надя) калăпларĕç.
«Спектакльти рольсене куракансен кăмăлне каймалла выляма тăрăшрăмăр. Паллах, çитменлĕхсем те çук мар. Çамрăксен вĕренмелли пайтах. Уйрăмах Владимир Григорьева халĕ те театрпа туслă пулнăшăн тав тăвас килет. Сасă режиссерĕ В.Кокшин пире яланах пулăшма хатĕр пулни савăнтарть. Малашне тата нумай-нумай спектакльпе сцена çине тухма ĕмĕтленетпĕр. Тепре тĕл пуличчен»,— тет халăх театрĕн режиссерĕ Л.Носова. Вăл унта ĕçлеме пуçланăранпа кăçал 4 çул çитет. Çак вăхăтра чылай спектакле сцена çинче выляма та ĕлкĕрнĕ.
Источник: "Каçал Ен"