17 апреля 2010 г.
Шупашкарта иртекен Пĕтĕм тĕнчери III кинофестиваль уçăличчен шутлă кунсем юлчĕç. Çавна май республика тĕп хулинче унпа çыхăннă ĕçлĕ канашлусенчен пĕринче çакăн пек хыпар пĕлтĕмĕр.
Кинофестиваль, малтан палăртнă пекех, майăн 8—12-мĕ-шĕсенче иртĕ. Ăна Раççей Культура министерстви пулăшнипе йĕркелеççĕ тата Аслă Çĕнтерĕве халаллаççĕ. Президенчĕ — Раççей Федерацийĕн халăх артисчĕ, «Мосфильм» киноконцерн генеральнăй директорĕ, РФ Общество палатин членĕ Карен Шахназаров кинорежиссер. Фестивалĕн пултарулăх ертÿçи — Сергей Лаврентьев киновед, программа дирекцине те вăлах ертсе пырать.
Жюри председателĕ — Миролюб Вучкович, Серби киноцентрĕн директорĕ, Белград фестивалĕн арт-директорĕ, «Кăнтăр — Европа» кинокомитет председателĕ, киновед, кино историкĕ, Европа киноакадемийĕн членĕ (Серби).
Жюри членĕсен йышĕнче çаксем пулĕç: Раççей халăх артистки Лидия Федосеева-Шукшина, Аяз Салаев кинорежиссер, телеертÿçĕ, Елена Стишова кинокритик, СССР халăх артисчĕ, К.В.Иванов ячĕллĕ Чăваш патшалăх академи драма театрĕн пултарулăх ертÿçи Валерий Яковлев.
Фестиваль программи пĕлтĕрхи пекех пуян. «Çеçпĕл» кинотеатрта конкурса тăратнă тулли метражлă илемлĕ фильмсене кăтартĕç. Кунтах майăн 8—9-мĕшĕсенче «Çар кино каçĕ» тата «Карен Шахназаровăн фильмĕсен каçĕ» иртĕç. Вера Токаревăн «Незабываемое» тата «Однофамильцы Федоровы» ĕçĕсемпе паллашни — кинофестивалĕн хăйне евĕрлĕхĕ.
«Салют» культура керме-нĕнче ятарлă программăсем — «Кино — ачасене», «Раççей çамрăкĕсен киновĕ», «Вак халăхсен кинематографĕ» — кăтартĕç.
Вăрçăпа çыхăннă фильмсене, Тăван çĕршывăн Аслă вăр-çинче çĕнтернĕренпе 65 çул çитнине халалланисене тĕп хулари Хĕрлĕ тÿремре уçă тÿпе айĕнче пăхма май килĕ. Çавăн пекех Наци библиотекипе ЧР патшалăх электрон тата кинодокументаци архивĕн кинозалĕсем те куракансене йышăнĕç. Наци библиотекинче документлă фильмсемпе, «Вак халăхсен кинематографĕ» ярăмри ĕçсемпе паллаштарма та палăртнă.
Çĕнĕ Шупашкарсене «Атăл» кинотеатрта «Шедеврсем таврăнни» ярăмпа Андрей Тарковскин «Зеркало» тата «Андрей Рублев» фильмĕсене кăтартĕç.
Кинофестивале актерсенчен кам хутшăнассине çитес вăхăтра пĕлтерĕç.
Иртнĕ çул республикăри çынсем çĕршывра паллă ят çĕнсе илнĕ чылай актерпа, режиссерпа тĕл пулнăччĕ. Кăçал та вĕсем сахалах пулмĕç, хăйсен творчествипе халăха паллаштарĕç.
Источник: "Каçал Ен"