03 апреля 2010 г.
Чăваш чĕлхипе литературине, тăван ен культурине вĕрентекенсемпе вĕренекенсем кашни çулах иртекен «Туслăх хĕлхемĕ» фестивале хастар хутшăнаççĕ. Кăçал ку фестивале Вĕрентекен çулталăкне, К.В. Иванов поэтăмăр 120 çул тултарнине тата Аслă Çĕнтерÿ пулнăранпа 65 çул çитнине халалланă.
Пуш уйăхĕн 27-мĕшĕнче Комсомольски 2-мĕш вăтам шкулне районти пур шкултан та чăвашлăхшăн тăрăшакан вĕрентекенсемпе чăваш тумĕ тăхăннă пултаруллă каччăсемпе хĕрсем пуçтарăнчĕç. Чи малтанах уява пухăннисене районти вĕрентÿ пайĕн методисчĕ В.Г.Петрова саламларĕ, уяв программипе паллаштарса ăнăçу сунчĕ. Ачасем тĕрлĕ ушкăнсене пайланса хăйсен пĕлĕвĕсене тĕрĕслерĕç. «Чăвашлăх тĕнчи» мультимедийлă презентацисен конкурсĕнче çак темăсемпе проектпа тĕпчев ĕçĕсем хатĕрлемелле пулнă: «Çĕнтерÿçĕсем манăçмаççĕ», «К.В. Иванов поэминчи çут çанталăк сăнарĕ», «Чăваш литературинчи учитель сăнарĕ», «Чăваш çĕршывĕн хастар утăмĕсем». Малти вырăна Екатерина Данилова (Хирти Мăнтăр вăтам шкулĕ) тивĕçнĕ. Кирилл Кириллов (Нĕркеç), Максим Владимиров (Хырай Ĕнел), Виктория Кузьмина (Аслă Чурачăк), Анна Белкова (Хырхĕрри), Дмитрий Катмаков (Асанкасси), Мария Сорокина (Тăманлă Выçли), Наталья Софронова (Кĕçĕн Çĕрпÿел), Галина Павлова (Хирти Явăш), Андрей Федоров (Шурут) ĕçĕсене те палăртса хăвармалла. Ачасем хăйсен ĕçĕсенче шырав мелĕпе тĕплĕн усă курни, материала пĕлсе вырнаçтарни сисĕнет.
«Çăлтăрчăк» вăйă-конкурсра чăваш, тутар ачисем «Чĕвĕлти чăваш чĕлхи», «Илемлĕх тĕнчи», «Халăх сăмахлăхĕ», «Чăваш çĕршывĕн паллă çыннисем», «Пирĕн пултарулăх» станцисенче вăй виçрĕç. Тупăшура Комсомольски 1-мĕш вăтам шкулĕнчи 7-мĕш класра вĕренекен Карина Долгова малти вырăна тухма пултарчĕ. Комсомольски 2-мĕш вăтам шкулĕн вĕренекенĕсем Мария Михайловăпа Анна Николаева, Диана Гибатдинова (Хирти Мăнтăр), Елена Зайцева (Александровка), Разиля Сафиуллина (Тукай Мишер), Зульфира Камальдинова (Шурут), Айгуль Муллина (Чĕчкен), Эльмира Ахметова (Урмаел) пултарулăхпа палăрчĕç.
«Асамат — 2010» олимпиадăра тăван ен культурине вĕренекенсем тупăшрĕç. Чи пултарулли Шурут вăтам шкулĕнчи 7-мĕш класри Руслан Лукин пулчĕ. Анастасия Шингалова (Комсомольски 2-мĕш), Александра Федорова (Хырхĕрри), Анастасия Данилова (Çĕнĕ Мăрат), Мария Алякина (Хирти Мăнтăр) хуравĕсем 2—3-мĕш вырăнсене тивĕçнĕ.
«Шевле — 2010» ÿкерчĕксен выставки те куракансене килĕшрĕ. Вăл «Тавтапуç, учителĕм, сана...» темăпа иртрĕ. Вĕсенчен чи кăтартулли — Ольга Акчуринан (Кĕçĕн Çĕрпÿел) ĕçĕ. Николай Михайлов (Комсомольски 1-мĕш), Наташа Миронова (Хирти Мăнтăр), Анастасия Акчурина (Кĕçĕн Çĕрпÿел), Динара Борисова (Çĕнĕ Мăрат) ĕçĕсене те палăртса хăвармалла. Районта мала тухнă ачасем ака уйăхĕнче республикăри ăмăртăва хутшăнаççĕ. Вĕсене ăнăçу сунса малти вырăнсене йышăнасса шанатпăр.
Источник: "Каçал Ен"