03 апреля 2010 г.
Чăваш патшалăх ял хуçалăх академийĕ шкул ачисене валли тĕрлĕрен конкурс, викторина тăтăшах йĕркелет. Акă, нумаях пулмасть академи ирттернĕ викторинăсене, конкурссене пирĕн район ачисем те чылайăн хутшăннă. Çĕнтерÿçĕсен йышне лекме пултарнă. «Юный земледелец» викторинăра Николайпа Константин Черновсем (Нĕркеç вăтам шкулĕ) палăрнă. «Юный зоотехник» викторинăра çак шкултах пĕлÿ пухакан Екатерина Николаевăпа Андрей Вишнев виççĕмĕш вырăна тивĕçнĕ. Наталья Яковлева (Нĕркеç вăтам шкулĕ) «Моя будущая профессия — ветеринарный врач» викторинăра çĕнтерĕве алран вĕçертмен. Вĕренекенсене хими тата биологи учителĕ М.В.Тишова хатĕрленĕ.
Сочинени конкурсĕнче те ачасем пултарулăхпа палăрнă. Тĕслĕхрен, «Агрономия» номинацире Настя Автономова (Кĕçĕн Çĕрпÿел), «Ветеринария» номинацире Алена Кокшина (Хырай Ĕнел) иккĕмĕшсем пулнă. Вĕренекенсен çĕнтерĕвĕнче чăваш чĕлхипе литература вĕрентекенĕсен В.С.Ефимовăпа Л.Н.Владимирова тÿпи те пысăк. Апрелĕн 3-мĕшĕнче Чăваш патшалăх ял хуçалăх академийĕнче уçă алăксен кунĕ иртет. Унта призерсене тата вĕрентекенсене Дипломсем тата парнесем парса чыслаççĕ.
Источник: "Каçал Ен"