31 марта 2010 г.
Кĕнекепе туслашакан ача çирĕп ăс-тăнлă çитĕнет. Çакна вĕрентекенсем те, ашшĕ-амăшĕсем те лайăх пĕлеççĕ. Анчах та паян, информаци технологи-йĕсем аталаннă вăхăтра, çамрăк ăрăва библиотекăпа туслаштарма çăмăлах мар. Вĕсем ытларах компьютерпа интересленеççĕ, телевизор кураççĕ. Апла пулин те районти тĕп библиотекăна çÿрекен вĕренекенсем чылайăн. Кунта тăтăшах тĕрлĕ мероприяти, конкурс, викторина йĕркелени те ачасене илĕртет. Акă, халĕ унта ача-пăча кĕнекисен эрнелĕхĕ пырать. Мероприятисен планĕ пысăк. Мартăн 24-мĕшĕнче П.П.Ершов писатель çуралнăранпа 195 çул çитнине халалланă уява Комсомольски 1-мĕш тата 2-мĕш вăтам шкулĕсенчи 3-мĕш класс ачисем пуçтарăнчĕç. Çыравçăн пултарулăхĕпе пурнăçне аса илсе викторина пулчĕ, тупмалли юмахсене те ачасем аван шĕкĕлчерĕç. Р.Н.Свистунова библиотекарь (Комсомольски 1-мĕш вăтам шкулĕ) «Звездный час» вăйă ирттерчĕ. Вĕренекенсем «Теремок», «Колобок» юмахсене кăтартса пачĕç. 3-мĕш «б» класс ачисем (ертÿçи В.В.Дряблова) юмах валли пуканесем ăсталанă. Вĕсем рольсене чăннипех те лайăх калăпларĕç. «Теремок» юмаха вылякансен тумĕсем хăйне евĕрлĕ пулчĕç. Ачасем чăннипех те тăрăшуллă.
Шкулсенчи ытти вĕренекенсем те эрнелĕхе хастар хутшăнчĕç.
Источник: "Каçал Ен"