31 марта 2010 г.
Иртнĕ кунсенче район администрацийĕн ларусем ирттермелли залĕнче районти хурт-хăмăрçăсен канашлăвĕ пулса иртрĕ. Ун ĕçне ял хуçалăх предприятийĕсенчи утарçăсем, ялсенчи хурт-хăмăр ăстисем, зооветеринари специалисчĕсем хутшăнчĕç. Хурт-хăмăр ĕрчетес ĕç районта вăй илсе пынипе пулĕ, хальхи канашлăва унпа тачă çыхăннă 100 яхăн çын килчĕ. Канашлăва, кĕске сăмах каласа, район администрацийĕн ял хуçалăх пайĕн тĕп зоотехникĕ К.Г.Гимальдинов уçрĕ.
Чăн малтан районта хурт-хăмăр енĕпе ĕçлекен зоотехник М.Г.Пильщикова отрасль 2009 çула мĕнлерех кăтартусемпе вĕçленипе паллаштарчĕ, вăлах çуркуннехи-çуллахи задачăсем çинче чарăнса тăчĕ.
Паян районта виçĕ пин ытла хурт çемйи пур. Вăл шутран 270-шĕ — хуçалăхсен утарĕсенче. Хурт-хăмăр ĕрчетни ял хуçалăхне те аталанма нумай пулăшать. Кашни вĕллерен пыл илессипе иртнĕ çулхи кăтартусемпе «Заря» кооператив утарçи Л.В.Шуряшкина пĕрремĕш вырăн йышăнчĕ (35,5 килограмм), «Асаново» кооператив утарçин кăтартăвĕ 14,9 килограмм (иккĕмĕш вырăн), виççĕмĕш кăтарту В.К.Петровăн («Слава» кооператив), вăл кашни вĕллерен 13 килограмм пыл илнĕ.
Районти ветеринари станцийĕн лаборатори заведующийĕ С.А.Васильев хурт-хăмăр чирĕсем пирки, чире вăхăтра тупса палăртса унпа мĕнлерех кĕрешмелли çинчен каласа пачĕ.
Республикăри хурт-хăмăр агентствин генеральнăй директорĕ Г.А.Максимов хурт-хăмăр ĕрчетессипе çыхăннă нумай ыйтăва çĕклерĕ, ку ĕçе малалла аталантарма май паракан тĕслĕхсем илсе кăтартрĕ, ĕçлĕ сĕнÿсем пачĕ.
Докладчиксене районти хурт-хăмăр ăстисем хăйсене кăсăклантаракан ыйтусем сахалах мар пачĕç, вĕсем çине тулли хуравсем илчĕç. Канашлура тухса калаçакансем — хăйсен паха тĕслĕхĕпе паллаштаракансем те активлăхпа палăрчĕç. Акă, сăмахран, «Заря» кооперативăн утарçи Л.В.Шуряшкина чылай çул ĕнтĕ нумай корпуслă вĕллесемпе ĕçлет. Ĕçри кăтартăвĕсем те унăн курăмлă. Иртнĕ çул кашни вĕллерен вăтамран вăл (мăшăрĕ, Борис Георгиевич, нумай пулăшать) 39,5 чылай хурт-хăмăрçă «Слава картофелю» агрофирмăн ĕçĕпе кăмăлсăррине палăртрĕ. Уй-хирти ÿсентăрансене наркăмăшлă тĕрлĕ имçампа сапни хуртсемшĕн хăрушлăх кăларса тăратать. Çак ĕçе тăвассине 7—8 кун маларах ял поселенийĕсем урлă пĕлтерсен утарçăсем, ялсенчи хурт-хăмăрçăсем хуртсене сыхлама майсем тупнă пулĕччĕç.
Канашлу вĕçĕнче республикăри хурт-хăмăр агентстви ра-йонти тăрăшуллă хурт-хăмăрçăсене наградăсемпе, парнесемпе чысларĕ. Вĕсене «Заря» кооперативри Л.В.Шуряшкина тата «Искра» колхозри П.Я.Филиппов утарçăсем, Комсомольскинчи Г.А.Титов тата Кĕçĕн Каçалти А.М.Жирнов хурт-хăмăр ăстисем тивĕçрĕç. Çак наградăсене Геннадий Антонович пĕрисене утарсен тухăçне ÿстерсе пынăшăн, теприсене хурт-хăмăр продукчĕсем нумай хатĕрлесе панăшăн пачĕ.
Канашлу ĕçлĕ лару-тăрура иртрĕ. Хурт-хăмăрçăсем пĕр-пĕринпе тĕл пулса калаçма, ĕçри паха тĕслĕхĕпе туллин паллашма пултарчĕç. Çакă вĕсене малашне татах та ÿсĕмлĕрех ĕçлеме анлă çул уçса парĕ.
Источник: "Каçал Ен"