27 марта 2010 г.
Ачалăхра кашни çыннах юмахсен тĕнчи илĕртет. Вĕсенче пулса иртекен асамлă пулăмсем çинчен каласа паракан кĕнекесене пĕр сывламасăр тенĕ пек вуласа тухни паянхи кун та асра. Чăн та, епле-ха илĕртмĕç хăйĕн патне хитре пикесемпе вĕсене усал вĕри-çĕленсенчен хăтарас тесе пурнăçне шеллемесĕр кĕрешекен паттăрсем. Хĕр ачасем вара «Золушка» юмаха вуласа унпа пĕрле хурланнине те, савăннине те ас тăваççех ĕнтĕ. Нумай-нумай тертнуша курнă хыççăн илемлĕ пикепе вĕри чĕреллĕ принц тĕл пулнишĕн кашниех хĕпĕртенĕ, ахăртнех. Çавăнпа та шкулта «Кĕлпикесен» конкурсĕ иртес пирки хыпар тухсанах хĕр ачасем пикенсех унта хутшăнма кăмăл турĕç.
Кашни класс тупăшăва хутшăнма пĕрер хĕр ача суйларĕ. Палăртнă куна шкул ачисем чăтăмсăррăн кĕтрĕç. Уроксем хыççăн шкулĕпех ялти культура çуртне çул тытрĕç.
Чи малтанах аслă вожатăй Валентина Федоровна Лепешкина сăмах илчĕ. Юмахри принцессăсенчен пĕртте кая мар илемлĕ кĕпесем тăхăннă хĕр пĕрчисене ăнăçу сунчĕ.
Конкурсăн пĕрремĕш пайĕ — «Кĕлпикесем» хăйсемпе паллаштарни. Кунта уйрăмах тăваттăмĕш класра вĕренекен Ольга Трофимова палăрчĕ. Ăна класра пĕрле вĕренекен юлташĕсем пулăшса пычĕç. «Хозяюшка» конкурсра тупмалли юмахсене шĕкĕлчерĕç. Хуравĕсене пĕлме çăмăлах пулмарĕ пулин те, кашниех хăйĕн пĕлĕвне лайăх енчен кăтартрĕ. «Ал ĕç ăстисем» конкурсра йĕппе çип тытма пĕлнине, «Прическа» конкурсра çÿç-пуçа илемлĕ тирпейлеме пултарнине, «Чĕре» конкурсра çыннăн ăш-чиккинчи органĕсем епле вырнаçнине тĕшмĕртнине кăтартса пачĕç. «Бал» конкурсра хĕр пĕрчисем артистсенчен пĕртте кая мар юрларĕç, ташларĕç. «Ама çури амăш хушăвĕ» тупăшура вара пикенсех пăрçана фасольрен уйăрма тиврĕ. «Модельерсем» конкурсра пикесем ырă фейăсем пулăшса пынипе хутран касса кăларса, çилĕмпе е урăх хатĕр-хĕтĕрпе усă курса çыпăçтарса бал валли кĕпе ăсталарĕç. Юлашкинчен «кĕлпикесене» вĕсен принцĕсем «хрусталь пушмак» тăхăнтартрĕç, илемлĕ чечек çыххи парнелерĕç.
Жюри членĕсене пĕтĕмлетÿсене тума пĕртте çăмăл пулмарĕ. Канашласа балсене хушнă хыççăн 7-мĕш класра вĕренекен Алена Хлебникова пĕрремĕш вырăна тухни паллă пулчĕ. Иккĕмĕшпе виççĕмĕш вырăнсене Юлия Ятмановăпа (5-мĕш класс) Надежда Ятманова (9-мĕш класс) çĕнсе илчĕç. Ольга Трофимова (4-мĕш класс) «Мисс Юнона», Анастасия Ятманова (6-мĕш класс) «Мисс Веселье», Анастасия Белкова (8-мĕш класс) «Мисс Грация» ята тивĕçрĕç.
Конкурса хутшăнакансем те, куракансем те килĕсене тулли кăмăлпа саланчĕç.