27 марта 2010 г.
Районти вĕрентÿ учрежденийĕсенче маттур, пултаруллă вĕренекенсем пĕлÿ пухаççĕ тесех калама пулать. Çакна вĕсем тĕрлĕ конкурссенчи, мероприятисенчи, олимпиадăсенчи çĕнтерÿсемпе çирĕплетеççĕ. Ачасем вĕренÿре çеç мар, обществăлла ĕçре те хастар. Апла пулин те чи маттур, туслă, хастар вĕренекенсем хăш шкулта, ăçта пĕлÿ пухаççĕ-ши; Вĕсене тупса палăртма, пĕлÿ шайне, ăсталăхне, çаврăнăçулăхне тĕрĕслеме кăçал районта «Суперкласс!» конкурс ирттерчĕç. Унта хутшăнакансене комисси, жюри витĕр тухма çăмăлах пулмарĕ. Ачасене Шупашкартан килнĕ представительсем, районти тĕрлĕ учреждени специалисчĕсем çирĕп тĕрĕслерĕç, кашни ĕçе еплерех уçса панине, хатĕрленине шута илчĕç. 12 шкулта йĕркеленĕ «Суперкласс!» конкурса ачасем хаваспах хутшăннине те палăртма кăмăллă. Тĕп приз — Мускав хулипе паллашма, Патшалăх Думинче пулса курма май килни хавхалантарчĕ вĕсене. Çĕнтерес тĕллев кашнин куçĕнчех ялкăшрĕ пулĕ. Ытти конкурссенчи пекех, çĕнтерÿçĕ пĕрре, Мускавра вĕсем çеç пулса курĕç. Ыттисем вара Шупашкар хулипе паллашĕç.
«Финала çитме пултарнисем чăнах та маттур. Сирĕнпе пĕрле эпĕ те хĕпĕртетĕп. Ман шутпа, эсир — пурте çĕнтерÿçĕсем. Пурне те ăнăçу сунатăп»,— терĕ РФ Патшалăх Думин депутачĕ Павел Семенов уява уçнă май. Район пуçлăхĕ Г.Волков тĕлĕннине пытармарĕ: «Ачасем конкурса çакăн пек хастар хутшăнасса кĕтмен. Чăннипех те маттур эсир. Пирĕн тăрăхра пултаруллă çамрăксем çитĕнеççĕ, кунта иккĕленÿ çук. Паян чи маттурри çĕнтеретех».
Конкурсантсене хавхалантарма кашни шкултанах килнĕ. Зал лăк туллиех. Кунта пăшăрханакан, хавхалантаракан ачасем, вĕрентекенсем, ашшĕ-амăшĕсем, тус-юлташĕсем... «Суперкласс!» конкурс финалне «Мы — лучшие» шоу представлени евĕр йĕркелерĕç. Классем еплерех йĕркепе сцена çине тухассине капитансем шăпа ярса палăртрĕç. Чи малтан Комсомольски 2-мĕш вăтам шкулĕнче 10-мĕш «а» класра пĕлÿ пухакансем «Визиткăпа» паллаштарчĕç. Чăннипех те тĕрлĕ япалапа кăсăкланакан ачасем вĕреннине тĕслĕхсемпе çирĕплетрĕç. Кунта спортсменсем, художниксем, вĕренÿре малта пыракансем пĕлÿ пухаççĕ. Унтан Аслă Чурачăк вăтам шкулĕн 11-мĕш класс ачисем хăйсемпе паллаштарчĕç. Кĕçĕн Çĕрпÿел, Çĕнĕ Мăрат, Нĕркеç, Тукай Мишер вăтам шкулĕн вĕренекенĕсен те программи хăйне евĕр интереслĕ пулчĕ. Ачасем тĕрлĕ темăна хускатрĕç. «Учитель 20 лет спустя» килти ĕçе те вĕренекенсем çÿллĕ шайра хатĕрлени тÿрех паллă пулчĕ. Вĕсен тавракурăмĕ анлă, шухăшлавĕ тĕрлĕрен... Ачасем 20 çултан вĕрентекене тĕрлĕрен курнине, хакланине сăнларĕç. Унччен информаципе техника хатĕрĕсем темĕнле хăвăртлăхпа аталанаççĕ пулсан та, çынсем улшăнсан та — вĕренекенсем 20 çултан паянхи педагогсенех курасшăн. Шкулта пĕлÿ паракан йывăрлăхсене çĕнтерме пулăшакан вĕрентекен — темрен те хаклă. Çак кун районти искусство шкулĕн «Островок» (ертÿçи Т.Иванова), «Калейдоскоп» (ертÿçи Л.Григорьева) ушкăнĕсем чылай ташăпа савăнтарчĕç.
Жюри членĕсене чи пултаруллине палăртма çăмăл пулмарĕ. Сцена çинче пурте хăйсене лайăх енчен çеç кăтартрĕç. Култарчĕç, тĕлĕнтерчĕç, шухăша та ячĕç. Кашни класăн тумĕ пĕр пек пулни те тÿрех куçа курăнать. Пĕр сăмахпа каласан, маттур!
«Кам-ха чи-чи?»— пăшăлтатрĕç залра ларакансем жюри членĕсем канашланă вăхăтра. Вĕсем нумай кĕттермерĕç. Депутат пулăшуçи, комисси председателĕ А.М.Чернов, (конкурс пуçланнăранпах вăл комисси ĕçне йĕркелесе пырать) çĕнтерÿçĕ кам пулнине пĕлтерчĕ. Комсомольски 2-мĕш вăтам шкулĕн 10-мĕш «а» класс вĕренекенĕсем (ертÿçи Н.Г.Боровкова) — «Суперкласс!». Вĕсем çитес вăхăтра Мускав хулинче экскурсире пулĕç. Ачасен куçĕсенче савăнăç куççулĕ те палăрчĕ. Çак çĕнтерÿшĕн вĕсем сахал мар тăрăшнă, тен, çывăрман каçсем те пулнă. Конкурса тĕплĕн хатĕрленме шкул дирекцийĕ те пулăшнă, паллах. Çак кун вĕсем пурте залра ачасене хавхалантарчĕç. Иккĕмĕш вырăнта — Тукай Мишер вăтам шкулĕн вĕренекенĕсем (ертÿçи Г.М.Хайртдинова). Аслă Чурачăк вăтам шкулĕн ачисем (ертÿçи Г.Ф.Никифорова) — виççĕмĕш. Çĕнтерÿçĕсемпе конкурсантсене П.В.Семенов дипломсем парса чысларĕ. «Конкурс чăннипех те çÿллĕ шайра иртрĕ. Ачасем ячĕшĕн çеç хатĕрленменни савăнтарать»,— терĕ Павел Владимирович. Конкурса йĕркелесе ирттерессишĕн нумай тăрăшнă çынсене те тав тума манмарĕç. Район пуçлăхне Г.Волкова, вĕрентÿ пайĕн начальникне Н.Максимова, аслă методиста Т.Долговăна, культурăпа кану центрĕн директорне Г.Бормотинăна чĕререн тав турĕç, дипломсемпе чысларĕç. Конкурса хаçатра куллен çутатса пынăшăн «Каçал ен» хаçат редакцине те тав турĕç.