20 марта 2010 г.
Йăлана кĕнĕ тăрăх, мартăн 17-мĕшĕнче районта Пĕрлĕхлĕ информаци кунĕ пулчĕ. Ăна ирттерме Чăваш Республикин культура, национальноçсен ĕçĕсен, информаци политикин тата архив ĕçĕн министрĕ Р.М.Лизакова, Чăваш Республикин юстици министрĕн çумĕ Д.М.Сержантов, «Чăвашрегионгаз» ООО генеральнăй директорĕ, Чăваш Патшалăх Канашĕн депутачĕ К.С.Мифтахутдинов, «Хыпар» хаçатăн тĕп редакторĕ А.П.Леонтьев, Чăваш наци библиотекин директорĕ С.М.Старикова, «Фармация» ПУП генеральнăй директорĕ, Чăваш Патшалăх Канашĕн депутачĕ В.Н.Филимонов килсе çитрĕç. Кун йĕркинче лартнă ыйтусем çапла: «Çуракине лайăх хатĕрленсе ирттерсе ярасси, Аслă Çĕнтерÿ 65 çул çитнине чыслăн кĕтсе илесси».
Район пуçлăхĕ Г.Ф.Волков культура министрĕпе Р.М.Лизаковăпа Аслă Çĕрпÿел ял поселенийĕн территорийĕнче пулса кунти социаллă-культурăллă обьектсен ĕçĕпе паллашрĕç. Ĕçлĕ ушкăн Аслă Çĕрпÿел ял поселенийĕн пуçлăхĕпе Г.Г.Ракчеевпа, ял тăрăхĕн активĕпе тĕл пулса вĕсене, халăха пăшăрхантаракан ыйтусене хускатрĕ. Роза Михайловнăпа Геннадий Федорович Кĕçĕн Çĕрпÿел культура çуртне те çитсе курчĕç. Унта Л.Я.Чернов ертÿçĕ Аслă Çĕнте-рĕве 65 çул çитнине халалласа мĕнле мероприятисем йĕркелессипе паллаштарчĕ. Каярахпа ĕçлĕ ушкăн çакăнти вăтам шкулта, моделлĕ библиотекăра, ача садĕнче, пĕтĕмĕшле практика врачĕн уйрăмĕнче те пулчĕ. Шкул директорĕ С.В.Антонова, ял тата шкул билиотекарĕсем Г.В.Любимова, Л.В.Хораськина, ача сачĕн ĕçченĕ А.Л.Родионова тата В.В.Софронова врач хăйсен ĕçĕ-хĕлĕпе паллаштарчĕç, тĕллевсене тишкерчĕç.
Юстици министрĕн çумĕ Д.М.Сержантов ертсе пыракан ĕçлĕ ушкăн район администрацийĕн пуçлăхĕн çумĕпе, ял хуçалăх пайĕн начальникĕпе Г.М. Киргизовпа Хирти Сĕнтĕр ял поселенийĕн территорийĕнче пурăнакансемпе тĕл пулчĕç. «Чăвашрегионгаз» ООО генеральнăй директорĕ К.С.Мифтахутдинов капиталлă тата çурт-йĕр, коммуналлă хуçалăх пайĕн начальникĕпе Б.М.Каринкинпа Комсомольски ял поселенийĕнче пулчĕç. Унта килекенсемпе курса калаçрĕç, ыйтусем çине хуравларĕç. Çавăн пекех ытти ĕçлĕ ушкăнсем Шурут тата Урмаел ял поселенийĕсене те çитсе курчĕç.
Кăнтăрла иртсен ушкăнсем район пуçлăхĕн Г.Ф.Волковăн кабинетĕнче пухăнса ĕçсене пĕтĕмлетрĕç.
Источник: "Каçал Ен"