17 марта 2010 г.
Шкулсенче ĕçлекенсем хушшинче иртекен спорт ăмăртăвĕсене кăçал Вĕрентекен çулталăкне халалланă. Эпир тĕрлĕ енсемпе тупăшатпăр. Акă, нумаях пулмасть учительсем йĕлтĕр йĕрĕ çине тăчĕç. Старта 19 коллективри 107 çын тухрĕ. Чи йышлă командăсенчен Комсомольски 1-мĕш вăтам шкулне, районти вĕрентÿ пайне асăнмалла. Ăмăртăва шкул директорĕсемпе профсоюз комитечĕн председателĕсем хастар хутшăнчĕç. Йĕлтĕр йĕрĕ çине Комсомольски 1-мĕш вăтам шкулĕн директорĕ А.С.Терентьев, профком председателĕ Е.С.Свинина, Урмаел, Аслă Чурачăк, Кĕçĕн Çĕрпÿел вăтам, Тăманлă Выçли, Хирти Явăш, Хырхĕрри тĕп, Йÿç Шăхаль пуçламăш шкулĕсен директорĕсем Ф.Х.Камалтдинов, С.В.Лукиянов, С.В.Антонова, Е.Г. Басников, Н.Г.Ильин, Ю.П.Алексеев, А.Н.Албутова тăрса сывă пурнăç йĕркине тытса пынине çирĕплетрĕç. Профком председателĕсем И.И.Евграфова (Кĕçĕн Çĕрпÿел), Г.П.Краснова (Нĕркеç), Т.А.Полякова (Тăманлă Выçли). Г.П.Белкова (Хырхĕрри), И.В.Николаева («Колосок» ача сачĕ), С.Х.Самарина (вĕрентÿ пайĕ) дистанцисене япăх мар кăтартусемпе вĕçлерĕç. Районти вĕрентÿ пайĕн начальникĕ Н.А.Максимов чăн-чăн спорт тусĕ пулнине çи-рĕплетрĕ. Спорт ветеранĕсем В.И.Пундяковпа В.В.Белков ăмăртăва йĕркелесе пыма пулăшрĕç.
Çанталăк лайăх тăчĕ, хырлăхăн уçă сывлăшĕ пурин чĕрине те хăпартлантарчĕ. Уçланкăра чĕртнĕ кăвайт умĕнчи калаçу хаваслантарчĕ. Ăмăрту пĕтĕмлетĕвĕсем Комсомольски 1-мĕш вăтам шкулĕ пĕрремĕш, Нĕркеç вăтам шкулĕ иккĕмĕш, Хырхĕрри тата Хирти Явăш тĕп шкулĕсем виççĕмĕш пулнине çирĕплетрĕç.
— Хамăр сывлăхшăн хамăрăн тăрăшмалла, вĕрентекенсен ачасене тĕслĕх кăтартмалла,— терĕç пурте кăмăллăн.
Источник: "Каçал Ен"