17 марта 2010 г.
Район халăхĕн сывлăхĕшĕн тăрăшнипе, чир-чĕртен сипленипе çеç çырлахмаççĕ районти тĕп больница ĕçченĕсем. Хăйсем те тăтăшах спорт ăмăртăвĕсем йĕркелеççĕ, республикăри тупăшусене те хутшăнаççĕ. Ячĕшĕн çеç хутшăнмаççĕ, çулсеренех малти вырăнсене йышăнаççĕ. «Сывлăх сыхлавĕпе социаллă аталану министерстви тата медицина ĕçченĕсен профсоюзĕ йĕлтĕр спорчĕпе ирттернĕ ăмăртура эпир кăçал 30 команда хушшинче 4-мĕш вырăн çеç йышăнтăмăр. Ытти çулсенче 1—3-мĕш вырăнсене алăран яманччĕ-ха»,— тет васкавлă пулăшу пайĕнче ĕçлекен ăста спортсмен Н.Волков. Поликлиника ĕçченĕ М.Атаманова 2 километрлă дистанцире лайăх кăтарту туни пирки каларĕ. Лаборатори уйрăмĕнчи У.Гавриловăпа С.Александрова, администраци хуçалăхĕнче тăрăшакансем Ю.Кольцов, В.Кокшин, А.Горбунов (чи аслă участник) палăрнă. Васкавлă пулăшу уйрăмĕнчи А.Самаркин, Н.Волков, В.Краснов, С.Гаврилов та çĕнтерÿшĕн çине тăрса кĕрешнĕ. Хирурги уйрăмĕнчи Л.Гордеева вара çемйипех старта тухнă. Мăшăрĕ Владимир, ывăлĕ Стасик çемье командисем хушшинче 3-мĕш вырăн йышăннă.
Медицина ĕçченĕсем хăйсен тĕслĕхĕпе район çыннисене спортпа туслă пулмаллине кăтартса параççĕ. Апла пулсан вĕсенчен тĕслĕх илер. Çулла çуран чупар, хĕлле йĕлтĕр çине тăрар.
Источник: "Каçал Ен"