13 марта 2010 г.
Юлашки çулсенче ытларах та ытларах çын сывă пурнăç йĕркине суйласа илет, вĕсем тĕрлĕ спорт енĕпе интересленме пуçлаççĕ. Акă, сăмахран, Комсомольски ялĕнче хоккей команди йĕркеленчĕ. Унта ĕç хыççăн пушă вăхăтра çак вăййа юратакансем пуçтарăнаççĕ. Вĕсем тĕрлĕ çулхисем: вăтăртан иртнисем те, аллă çултан каçнисем те. Пĕр çемьерен темиçен вылякансем те пур: Самаринсем — ашшĕпе икĕ ывăлĕ, пĕртăван Воробьевсем — Сергейпе Олег, Олег ывăлĕ Роман. Уйрăмах Роман Воробьев çинчен калас килет. Вăл командăра — чи кĕçĕнни. Халĕ Комсомольски 1-мĕш вăтам шкулĕнче вĕренет, 10-мĕш класа çÿрет. Çавна пăхмасăрах, хоккейла ăста вылять, пултарулăхĕпе палăрать. Ашшĕ пекех, хоккеист пулма тăрăшать.
Пуш уйăхĕн 6-мĕшĕнче комсомольскисем Шăмăршă районĕн пĕрлештернĕ командипе тĕл пулчĕç. Тупăшу хĕрÿ иртрĕ. Пирĕннисем маттуртарах пулчĕç, 6:2 шутпа çĕнтерме пултарчĕç. Пирĕн командăшăн гол кĕртекенсем çаксем: Анатолий Самарин, Евгений Тихонов. Олег, Сергей, Роман Воробьевсем, Анатолийпе Александр Самаринсем, Николай Мамуткин, Вячеслав Добросмыслов, Павел Романов, Андрей Кашицын лайăх вылянине палăртмалла.
Вăйă курма пынисене асăнса хăвармалла. Вĕсем пирĕн командăшăн чунне парса хĕпĕртерĕç, вылякансене хавхалантарчĕç. Ю.Н.Митюков вара сăмаварпа вĕри чей илсе килсе хăналарĕ.
Пирĕн хоккей команди нумай пулмасть çеç йĕркеленнĕ. Çапах та ÿсĕмсем пур. Паян унта аслă çулхи арçынсем выляççĕ. Çĕнтерÿçĕсем ытларах пулсан, ун йышне çамрăксем те хутшăнасса шанас килет. Хĕллехи спорт тĕсне пропагандăлас тесе те выляççĕ хоккеистсем. Районта кун пек команда пурри питĕ паха пулăм.