10 марта 2010 г.
Мартăн 3-мĕшĕнче 2009 çулта тунă ĕçсене пĕтĕмлетсе Хырхĕрри ял поселенийĕнче пурăнакан граждансен пухăвĕсем иртрĕç. Вĕсене район пуçлăхĕ Г.Ф.Волков ертсе пыракан ушкăн хутшăнчĕ. РФ Пенси фончĕн Комсомольски районĕн-чи управленийĕн начальникĕ З.В.Каринкина, районти социаллă хÿтлĕх пайĕн начальникĕ И.А.Никитина, район больницин тĕп врачĕн çумĕ Т.С.Тимергалеева тата ыттисем хăйсен ĕç-хĕлĕ, çĕнĕлĕхсем пирки каласа пачĕç, ял çыннисен ыйтăвĕсем çине хуравларĕç.
Ĕçлĕ ушкăн çак кун виçĕ яла — Вăрманхĕрри Чурачăк, Хырхĕрри тата Эткер ялĕсене çитсе халăхпа тĕл пулса калаçрĕ, ял çыннисене хумхантаракан чылай ыйту пăхса тухрĕ.
Граждансен пухăвĕсенче Хырхĕрри ял поселенийĕн пуçлăхĕ А.Н.Воробьев, вырăнти культура, медицина ĕçченĕсем отчет туса пачĕç.
«Халăхпа, хуçалăх ертÿçисемпе пĕр-пĕрне çур сăмахранах ăнланса ĕçлени кăна ÿсĕмсем тума пулăшать. Ста- ростăсем те ялсенче тирпей-илем кĕртес тесе чылай тăрăшаççĕ. Вĕсене пурне те пысăк тав»,— çакăн пек сăмахсемпе вĕçлерĕ калаçăвне Анатолий Николаевич.
Пухура 2010 çулта самообложени (ирĕклĕ сулăм) укçине пуçтарасси пирки те сÿтсе яврĕç. Пухнă укçа-тенкĕпе вырăнлă усă курассине палăртрĕç, тĕллевсене те тишкерчĕç.
Çавăн пекех район пуçлăхĕ пухусенче Хырхĕрри ял поселенийĕн территорийĕнче пурăнакан Аслă Отечественнăй вăрçă ветеранĕсене «Аслă Çĕнтерĕве — 65 çул» юбилей медалĕсене парса чысларĕ.
Источник: "Каçал Ен"