03 марта 2010 г.
«Туслăхра — вăй» тесе ахальтен каламан ватăсем. Вăл чăннипех те çапла пулнине Комсомольски 2-мĕш вăтам шкулĕнче пĕлÿ пухакансем тĕслĕхпе çирĕплетрĕç. 10-мĕш класра вĕренекенсем пĕр çемьери пек туслă пурăннине, йывăрлăха парăнманнине сцена çинче кăтартса пачĕç. Ачасем РФ Патшалăх Думин депутачĕ П.В. Семенов пуçарнипе йĕркеленĕ «Суперкласс!» конкурса хастар хутшăнаççĕ, çĕнтерме те ĕмĕтленеççĕ. Вĕсем еплерех кăмăл-туйăмпа пурăннине, конкурса мĕнле хатĕрленнине П.Семеновăн пулăшаканĕсем А.М.Черновпа С.Д.Гордеева хăйсем курса ĕненчĕç. Сумлă хăнасем Комсомольски 2-мĕш вăтам шкулĕнче пулчĕç. 10-мĕш «а» тата 10-мĕш «б» классенче вĕренекенсем хăйсен ăсталăхĕпе туллин паллаштарчĕç тесен те йăнăш мар. Сцена çинче ачасем шкул пурнăçĕнчи хăш-пĕр самантсене аса илчĕç. Мультимедийлă презентацие те курăмлă хатĕрленĕ. Пухăннисем вара 10-мĕш «а» класс ачисен «Школа будущего» презентацине уйрăмах интересленсе пăхрĕç. Проект авторĕ А.Антонова унпа тĕплĕн паллаштарчĕ. Мĕнлерех кураççĕ-ха вĕсем шкула тепĕр 20 çултан; Тĕлĕнмелле хитре те капмар çурт пулмалла вăл. «Тĕслĕхрен, пирĕн шкула реконструкци тăвĕç. Унта пысăк спорт залĕ, бассейн, илемлĕ те хăтлă классем, чаплă столовăй, теннис корчĕ пулĕ. Ачасене пурăнма — хăна çурчĕ. Ун чухне кашнийĕшĕ автомашинăпа çÿрĕ, педагогсем вĕрентÿ менеджерĕсем пулĕç. Тĕслĕхрен, акăлчан чĕлхине алла илнĕ май урăх çĕршывсенче пулса курсан аванрах. Ачасен пĕлĕвне хальхи пек 5 паллăпа мар, 10 балпа хаклама пуçлĕç»,— пĕлтерчĕ проектпа паллаштарса Настя. Тата ытти нумай-нумай çĕнĕлĕхпе те усă курнă вĕренекенсем. Вĕсем чăннипех те тăрăшни курăнать.
Ачасем жюри членĕсене хăйсемпе тĕрлĕ енлĕн паллаштарчĕç. «Эпир пурте тĕрлĕрен» стена хаçатне те вĕсем ячĕшĕн çеç хатĕрлемен. Апла пулсан Мускав хулине экскурсие каяс ĕмĕт чăннипех те пысăк.
«Ачасем маттур, пултаруллă, ăста. Вĕсем пур çĕре те ĕлкĕреççĕ. 10-мĕш «а» класс (ертÿçи Н.Я.Боровкова) презентацие, портфолиона, хаçата аван хатĕрленĕ. Эпир тĕлĕнтĕмĕр»,— пĕлтерчĕç А.М. Черновпа С.Д.Гордеева.
«Суперкласс!» конкурс малалла пырать. Шкулти этапсем вĕçленнĕ, умра — район шайĕнчи тупăшу. Чи пултаруллисем çеç Мускава çитсе курĕç.
Источник: "Каçал Ен"