03 марта 2010 г.
Хăй çине хăй алă хурасси (çакăнса, перĕнсе тата ытти те) тĕнчипех анлă сарăлнă. Суицид тетпĕр ăна. Чăваш Республикинче, çавăн пекех пирĕн районта та, ун пек тĕслĕхсем пулсах тăраççĕ. Пĕтĕм тĕнчери сывлăх сыхлавĕн организацийĕ пĕлтернĕ тăрăх, тĕнчипе çулталăкне миллиона яхăн çын хăй çине алă хурать. Ку хисеп 2020 çул тĕлне 1,5 хут ÿсме пултарнине палăртаççĕ. Кун чухлĕ халăх вăрçăсенче, преступление пула, чир-чĕртен те вилмен. Пирĕн планета çинче кашни 40 çеккунтра çын пурнăçĕ хăй çине хăй алă хунипе татăлать. Сăлтавĕсем тĕрлĕрен: хурлану, пĕр-пĕрне ăнланманни, чун-чĕре ыратăвĕ... Çавăнпа та çывăх çынсемпе, тус-юлташсемпе тăтăшах калаçасчĕ, вĕсен хуйхисене ăнланасчĕ, йывăр вăхăтра юнашар пулма тăрăшасчĕ.
Кашнинех пурнăçра хуйхă-суйхă пулатех. Анчах та вĕсене тус-юлташпа, тăвансемпе пĕрле пайласа татса пама май пур. Кунсăр пуçне «шанчăк телефонĕсем» пур. Йывăр самантсенче шăнкăравласан сирĕнпе квалификациллĕ специалистсем калаçĕç. Сĕнÿ-канашсем парĕç. Ятăра ыйтмасăрах сирĕн сăмахăрсене тимлĕç. Тепĕр чухне чуна уçса калаçни пысăк пĕлтерĕшлĕ. Хăвăрăн хуйхăр-суйхăр, чун ыратăвĕ пирки, ниçта кайса кĕрейми вăхăтра Шупашкара 8(8352) 58-01-29, 58-31-31 номерсемпе шăнкăравлама пултаратăр. Чăтăмлă пулăр. Темĕнле хĕн чухне те пуç ан усăр, хăвăр çине хăвăр алă ан хурăр. Пурнăç пĕрре килет. Ăна упрăр. Тăрăшсан кирек мĕнле инкеке те çĕнтерме пулать.
Источник: "Каçал Ен"