20 февраля 2010 г.
Февралĕн 16-мĕшĕнче районти культурăпа кану центрĕнче «Чăваш пики» конкурс иртрĕ. Ăна чăвашсен паллă та мухтавлă поэчĕ К.В.Иванов çуралнăранпа 120 çул çитнине халалларĕç. Унта районти 6 ял поселенийĕн 6 пики хутшăнчĕ.
«Конкурсăн тĕп тĕллевĕ — район шайĕнче чăвашлăха упракансене тата çамрăклăх илемне сыхласа хăваракансене тупса палăртасси»,— каларĕ уяв сценарине хатĕрлекен районти культурăпа кану центрĕн ĕçченĕ Валентина Тимофеева.
Кану каçĕ пуçланиччен конкурса хутшăнакан Снежана Лакатошпа курса калаçрăм. «Эпĕ 9-мĕш класра вĕренетĕп. Анне, Юнтапа ял клубĕнче ĕçлекенскер, мĕн пĕчĕкрен мана юрра-ташша явăçтарнă. Ял тăрăхĕнче иртекен пĕтĕм мероприятисене хутшăнма тăрăшатăп. Шкулта та лайăх паллăсемпе кăна ĕлкĕрсе пыратăп»,— паллаштарчĕ вăл мана хăйпе.
Уявра хаваслă кĕвĕ-çемĕ янăрарĕ. Капăр тумлă хĕрсем ăсталăхне, пултарулăхне тата илемне 6 номинацире кăтартрĕç. Вĕсем хăйсемпе, ал ĕçĕсемпе паллаштарчĕç. Жюри членĕсен конкурсантсем хатĕрленĕ тутлă апат-çимĕçе астивме май пулчĕ. Çавăн пекех пикесем «Нарспи» поэмăри сыпăксене те вуласа залри çынсене хумхантарчĕç, юрă-ташăпа та савăнтарчĕç, паянхи Нарспи сăнарне те уçса пачĕç.
Хĕрÿ тупăшура Вероника Григорьева (Хирти Явăш тĕп шкулĕ) — пĕрремĕш, Мальвина Петрова (Нĕркеç вăтам шкулĕ) — иккĕмĕш, Снежана Лакатош (Шурут вăтам шкулĕ) тата Александра Алякина (Хирти Мăнтăр вăтам шкулĕ) виççĕмĕш вырăнсене тухрĕç. Любовь Пудовкина (Александровка тĕп шкулĕ) тата Настя Петрова (Хырай Ĕнел вăтам шкулĕ) та хăйсен ăсталăхне çÿлти шайра кăтартрĕç.
Источник: "Каçал Ен"