17 февраля 2010 г.
Кашни çулах Чăваш Республикин наци библиотеки çулталăк кĕнекине халалласа нарăс тата пуш уйăхĕсенче «Литературная Чувашия: самая читаемая книга года» ятпа конкурс ирттерет. Кăçал нарăс уйăхĕнче 2008 çулта тухнă кĕнекесен конкурсĕ пуçланчĕ. Унта пур библиотека та хутшăнать, вăл пуш уйăхĕн вĕçĕччен пырать. Конкурсри кĕнекесенчен чи нумай вуланаканнине тупса палăртма сĕнÿсене шута илеççĕ. Çапла вара конкурс номинацийĕсенчи «Чи лайăх чăвашла вуланакан кĕнеке», «Чи лайăх вуланакан вырăсла ача-пăча кĕнеки» çĕнтерÿçи палăрĕ.
«Литературăллă Чăваш Ен», «2008 çулта тухнă кĕнекесем» конкурс шайĕнче библиотекăсенче кĕнеке выставкисем, вулав конференцийĕсем, диспутсем, кĕнеке çыракансемпе тĕл пулусем иртĕç.
Конкурса 148 кĕнеке хутшăнать: чăвашла — 72, вырăсла — 76. Вĕсен хушшинче çак авторсене асăнса хăварас килет: Г.Айхи, Б.Борлен, Д.Гордеев, М.Кипек, Н.Симунов, И.Тенюшев, Г.Уткин, В.Шемекеев, П.Эйзин, М.Юхма тата ытти те.
Хисеплĕ вулакансем, литературăна юратакансем, эсир конкурса хутшăннă чи лайăх кĕнекесене палăртасса шанса тăратпăр. Хăвăрăн шухăш-кăмăлăрсене ялти библиотекăсем урлă та пĕлтерме пултаратăр. 2008 çулта тухнă, конкурса тăратнă кĕнекесем районти тĕп тата ялти библиотекăсенче пур. Вĕсене эсир илсе вулама пултаратăр.
Пĕтĕмлетÿ тунă чухне кашни çын миçе кĕнеке вуланине те тимлĕх уйăраççĕ. Конкурса хутшăннă кĕнекесенчен нумайăшне вуланă çын вара çĕнтерÿçĕ пулса тăма пултарать. Вăл «Чи нумай вулакан» номинацире парне выляса илĕ.
Кĕнекесемпе паллашăр, илсе вулăр, библиотекăсенче сире хапăл туса кĕтеççĕ.
Источник: "Каçал Ен"