06 февраля 2010 г.
Юлашки çулсенче ачасене вĕрентес ĕçре çĕнĕ меслетсемпе, информатика технологийĕсемпе усă курма тăрăшаççĕ. Паллах, урокра доскапа тата пурăпа çеç ĕçлени паянхи кун ыйтăвĕсене тивĕçтермест. Проект меслечĕпе усă курни çак ĕçре пысăк вырăн йышăнать. Мĕн-ха вăл проект?
Ачасем проект методикипе ĕçлеме пуçласан инфоромаци пухас культура аталанать. Паха опыта çирĕплетнĕ май, çакăн евĕрлĕ тĕпчев ĕçĕпе тăрăшакансем палăртнă ыйтăвăн тĕп проблемине шыраса тупма тата тĕрĕс çырса пама вĕренеççĕ, гипотезăсем сĕнеççĕ, ĕçе тĕрлĕ этапсем çине пайлаççĕ, ун планне çирĕплетеççĕ. Хатĕрлесе çитерсен ăна кăтартма та пĕлеççĕ, презентаци хатĕрлеççĕ тата тĕрĕс хÿтĕлеççĕ.
Акă, иртнĕ кунсенче Комсомольски 1-мĕш вăтам шкулĕнче проектсен пĕрремĕш фестивалĕ иртрĕ, унăн ячĕ — «Открытие». Ĕçсене 6 номинацире пăхса тухрĕç: «Культура тата искусство», «Наукăпа пурнăç», «Йĕри-тавра тĕнче», «Уйрăм çын тата çемье историйĕ», «Электронлă пособи» тата «Пуçламăш классем».
Асăннă фестивале пурĕ 40 ĕç тăратнă. Вĕсене пурне те пысăк шайра хатĕрленĕ, пурнăçра усă курма май пур. Фестивальте Рома Воробьев «Манăн кил-йыш тăхăмĕ», Анна Титова «Аслă Отечественнăй вăрçă вăхăтĕнчи учитель сăнарĕ», Айнур Минибаев «Чăваш тăрăхĕнчи пĕрремĕш фильмсем», Альфинур Назмеева «Виçĕ пурнăç», Наташа Галкина «Килти аптекăри хими» ĕçсемпе паллаштарчĕç. Çавăн пекех 10-мĕш, 9-мĕш тата 7-мĕш классенче вĕренекенсен творчество ушкăнĕсем тăрăшса ĕçленине палăртмалла. Куракансем Женя Сизов, Таня Иванченко, Алеша Смирнов, Маша Петрова, Богдан Шикарев ĕçĕсене хапăл туса йышăнчĕç.
Шкулти учительсем те про-ектсем хатĕрлеме хастар хутшăнчĕç. Фестивале Н.Н.Тихонова, Н.И.Воробьева, З.Г.Чернова, Л.А.Афанасьева, Е.С.Свинина, С.И.Афки тата ыттисем те ĕçсем тăратрĕç, ăсталăхĕпе палăрчĕç.
Çакăнпа шкулта проектсем тăвасси вĕçленмен. Вĕсем кăçалхи Вĕрентекен çулĕнче малалла тăсăлĕç.
Источник: "Каçал Ен"