10 февраля 2010 г.
Ачасене патриотла, интернационалла воспитани парасси — питех те пысăк ĕç. Çак енĕпе Комсомольски 1-мĕш вăтам шкулĕнче ĕçлекенсем нумай тăрăшаççĕ. Вĕсем январĕн 23-мĕшĕнчен пуçласа февралĕн 23-мĕшĕччен иртекен çарпа спорт уйăхлăхне те активлă хутшăнаççĕ.
Акă, иртнĕ кунсенче ЧР çар ĕç комиссариачĕн Комсомольски тата Елчĕк районĕсемпе ĕçлекен пай начальникĕпе А.А.Мауринпа тĕл пулу йĕркелерĕç. Çамрăксене çарпа çыхăннă нумай ыйту кăсăклантарать иккен. Уйрăмах çар училищи пирки интересленчĕç вĕсем. Андрей Анатольевич ачасен ыйтăвĕсем çине тулли хуравсем пачĕ.
Класс тулашĕнче ăнăçлă йĕркеленĕ ĕçсем те патриотизмла туйăмсене çирĕплетеççĕ. Вĕренекенсемпе «Çĕр тата çын» музейри Çар мухтавĕн пÿлĕмĕнче фотовыставка курса ĕçпе вăрçă ветеранĕсемпе те паллашрăмăр. 10-мĕш «а» класс (ертÿçи – Н.В.Сереброва) ачисем В.И.Чапаев кун-çулĕ пирки видеоальбом тăрăх пĕлчĕç. А.Ф.Мамуткинпа В.П.Автономов физкультура учителĕсем «Хаваслă стартсем», «Йĕлтĕр йĕрĕ чĕнет», «Çирĕп сывлăх хамăр алăра» вăйăсем те ирттерме палăртнă.
Чăваш чĕлхипе литература вĕрентекенĕсем С.А.Жукова, А.В.Прокопьева, В.Г.Гордеев уроксенче Аслă Отечественнăй вăрçăра хăюлăхпа паттăрлăх кăтартнă салтаксем çинчен çырнă кĕнекесемпе паллаштарчĕç. Тĕслĕхрен, Илпек Микулайĕн «Госпитальте», А.Артемьевăн «Симĕс ылтăн» тата ытти произведенийĕсене вуланă хыççăн вăрçă тискерлĕхĕ, совет салтакĕсен паттăрлăхĕ çинчен пĕлме пулать. Акă, А.Мересьев çинчен каласа паракан «Чăн-чăн çын çинчен çырнă повеç» кĕнеке хăех мĕне тăрать! Асăннă произведенисемпе вулав конференцине те ирттерчĕç. Социаллă педагог Е.И. Степанова Ленинград блокадин кунĕсем çинчен каласа пачĕ.
Кĕçĕн класра вĕренекенсем аслă вожатăй А.Н.Артемьева ертсе пынипе «Зов джунглей» вăйă ирттерчĕç.
Источник: "Каçал Ен"