10 февраля 2010 г.
Мĕн пĕчĕкренех тĕрлĕ енлĕ аталанса ÿсекен ачасем пурнăçăн анлă çулĕ çине тухсан та çухалса каймаççĕ. Шăпах çавăн пек ĕмĕте пурнăçа кĕртсе февралĕн 7-мĕшĕнче Урмаелĕнче Чăваш Енри тутарсен наципе культура автономийĕн кубокне çĕнсе илессишĕн пĕрремĕш хут хоккей турнирĕ иртрĕ.
Унта Чăваш Енри тутарсен наципе культура автономийĕн председателĕ Р.Ш.Санзяпов, Чăваш Енри тутарсен наципе культура автономи совечĕн председателĕ Ф.А.Гибатдинов, «Чăвашрегионгаз» ОООн генеральнăй директорĕ К.С.Мифтахутдинов тата ыттисем те килсе çитрĕç. Сивве пăхмасăрах районти сывă пурнăç йĕркине кăмăллакансем, уйрăм предпринимательсем те пухăнчĕç.
Килсе çитнĕ хăнасем çамрăк спортсменсем умне тухса калаçрĕç, ăнăçу сунчĕç. «Сывă пурнăç йĕркине тытакан çамрăксем киревсĕр йăла-йĕркене хирĕçлеме пултараççех. Тĕрĕс воспитани илесси спортпа тата физкультурăпа тачă çыхăнса тăрать. Çак ĕçе туса пыма профессилле пысăк компетентлăх кирлĕ. Шăпах çавăн пек мал ĕмĕтлĕ учитель Нежеметдин Сахров»,— терĕ Кияметдин Садртдинович, шкулта вĕренекенсене хоккей клюшкисем парнелесе.
Турнира пурĕ 4 команда хутшăнчĕ. Евгений Тихоновпа Александр Пундяков вăйă судйисем пулчĕç.
Турнир вĕçĕ яланах интереслĕ. Хĕрÿ тупăшура Урмаел вăтам шкулĕн спортсменĕсем чи маттуррисем пулнине палăртрĕç, вĕсем пĕрремĕш вырăна çĕнсе илчĕç. Малашне те турнира кашни çулах ирттерме калаçса татăлчĕç.
Çитес çул çак ăмăртăва ытти шкулсенчи командăсем хутшăнасса шанас килет.
Источник: "Каçал Ен"