30 января 2010 г.
Чăваш Республикин Президенчĕн Указĕпе килĕшÿллĕн Чăваш Енре 2010 çул Вĕрентекен çулталăкĕ тесе палăртнă. Вĕрентекен çулталăкне шута илсе районта тĕрлĕ мероприятисем иртеççĕ. Раççей Федерацийĕн Патшалăх Думин депутачĕ Павел Семенов пуçарнипе районта 10—11-мĕш классем хушшинче чи лайăх класа палăртас тĕллевпе «Супер класс!» конкурс иртет.
Кăрлач уйăхĕн 18-мĕшĕнче шкулти тапхăр пуçланчĕ. 10—11-мĕш классен ертÿçисем конкурс положенийĕпе тĕплĕн паллаштарчĕç. Конкурс питĕ илĕртÿллĕ. Районти чи лайăх класс Мускав хулине экскурсие кайĕ. Ачасем Патшалăх Думине, Мускав Кремльне çитсе курĕç.
Çĕнтерÿçĕ пулма çăмăлах пулмĕ. Класс ушкăнĕсем «Эпир пурте тĕрлĕрен» ятпа хаçат калăплĕç, «Пулас шкул», «Пирĕн шухăшсем Раççей шкулĕ çинчен», «Раççей пуласлăхĕ çамрăксен аллинче», «Эпир хавас та туслă пурăнатпăр» темăсенчен пĕринпе презентаци хатĕрлĕç, класс портфолийĕпе паллаштарĕç. Ачасен çитĕнĕвĕсене çеç мар, çи-пуçне, тыткаларăшне те шута илĕç. Класс ушкăнĕсем хăйсемпе паллаштарнисĕр пуçне вĕрентекен тепĕр 20 çултан еплерех пулнине кăтартса парĕç, класс ертÿçисем хăйсен паха опычĕпе паллаштарĕç. Хальхи вăхăтра шкулта ĕç вĕресе тăрать.
Раççей Федерацийĕн Патшалăх Думин депутачĕн Павел Семеновăн пуçарăвĕ пире лайăхрах вĕренме, чи маттуррисем пулма хистесе тăрĕ.
Источник: "Каçал Ен"