28 ноября 2009 г.
Тăван çĕр-шывăн Аслă вăрçи вĕçленнĕренпе часах 65 çул çитет. Сахал мар вăхăт вăл. Пирĕн пуласлăхшăн тăван çĕр-шыва хÿтĕленĕ, тылра çĕнтерĕве туптанă çынсен йышĕ çулсерен мар, кунсерен чакса пырать. Чăннипех те вĕсем чыс-хисепе тивĕçлĕ. Ячĕсене манса каймалла мар. Кашни килтех çĕнтерĕве туптама хутшăннă çынсем пур. Вăрçă хирĕнче-и,тылра-и вĕсем паянхи пуласлăхшăн тăрăшнă.
Çак кунсенче районти культурăпа кану центрĕ тата вĕрентÿ пайĕ пĕрле вăрçă темисемпе çырнă произведенисене вулакансен конкурсне ирттерчĕç. Комсомольски 1-мĕш тата 2-мĕш, Çĕнĕ Мăрат, Урмаел, Шурут, Хырай Ĕнел, Хирти Мăнтăр, Тукай Мишер, Асанкасси вăтам шкулĕсенче вĕренекенсем сцена çине тухрĕç. Александровка, Чĕчкен пĕтĕмĕшле пĕлÿ паракан шкулсенчи ачасемпе вĕрентекенсем те хăйсен пултарулăхне кăтартрĕç. Жюри членĕсене вăл е ку сăвва кам лайăхрах вуланине палăртма та йывăр пулчĕ. Вăрçă хăрушлăхĕ çамрăклах пуç хунă паттăрсен, килĕсене таврăнайман салтаксен амăшĕсен хурланăвĕ, пирĕн пуласлăхшăн пуç хунă паттăрсем, паянхи ветерансем... Пур темăсене асăнса та пĕтереймĕн.Чăвашла вĕренекен ачасем вырăс çыравçисен сăввисене вулани мана кăмăла каймарĕ. Вĕсене хурлаймастăн, чăннипех те чаплă произведенисем. Анчах та чăваш поэчĕсем те вăрçă паттăрĕсене мухтаса, ывăлĕсене çухатнă ашшĕ-амăшĕпе хурланса çырнă сăввисем пулнă-çке. Вырăс-тутар ачисене ăнланма пулать. Жюрие вĕсем вырăсла хăйсен пултарулăхне кăтартрĕç. Чăвашсем вара вырăслантăмăр-ши?
«Пĕрне ырласа, теприне хурласа калас килмест. Пултаруллисенчен татах та пултаруллисене палăртма тиветех», - терĕç жюрире ларакансем.
5—8-мĕш класра вĕренекенсем хушшинче Ирина Тимофеевăпа Виктория Матвеева (Комсомольски 1-мĕш вăтам шкулĕ) пĕрремĕшпе иккĕмĕш вырăнсене, Зиля Сулеймановăпа (Урмаел вăтам шкулĕ) Камиля Мавлютова (Комсомольски 2-мĕш вăтам шкулĕ) виççĕмĕш вырăнсене йышăнчĕç. Талантлă хĕрсемпе арçын ачасем шкулсенче чылай. 9—11-мĕш классенче вĕренекенсем хушшинче те вĕсем нумайăн. Çавăнпа та çак номинацире кашни малти вырăна икшер ача тивĕçрĕ. Пĕрремĕшсем — Ильдар Зейнетдинов (Урмаел вăтам шкулĕ) тата Кристина Кашина (Хирти Явăш пĕтĕмĕшле пĕлÿ паракан тĕп шкул), иккĕмĕш вырăна çĕнсе илнисем — Анна Широкина (Комсомольски 1-мĕш вăтам шкул), Алина Зарипова (Урмаел вăтам шкулĕ), виççĕмĕш вырăнта — Андрей Степанов (Хирти Явăш тĕп шкулĕ), Роман Воробьев (Комсомольски 1-мĕш вăтам шкулĕ).
Жюри чăвашла сăвăсем калакансене те палăртрĕ. Хисеп грамотине Хирти Явăш пĕтĕмĕшле пĕлÿ паракан тĕп шкулĕн вĕренекенĕ Марина Рубцова тата Асанкасси вăтам шкулĕн вĕрентекенĕ Тамара Васильевна Салаева тивĕçрĕç.
Шурут вăтам шкулĕнчи Ангелина Михайлова тата Çĕнĕ Мăрат вăтам шкулĕнчи Катя Соловьева вăрçă темипе хăйсем хайласа сăвăсем çырнă. Вĕсем те наградăсем илчĕç. М.Мингалеева (Тукай Мишер вăтам шкулĕ), Г.Зейдулина (Чĕчкен пĕтĕмĕшле пĕлÿ паракан тĕп шкулĕ), С.Родионова (Хырай Ĕнел вăтам шкулĕ) вĕренекенсене конкурса илсе килнипе çеç çырлахмарĕç, хăйсем те сцена çине тухрĕç, сăвăсем вуларĕç. Вĕсене куракансем хапăлласа йышăнчĕç.
Сăвă вулакансен конкурсĕнче çĕнтернисене Хисеп грамотисем, унта хутшăннисене сертификатсем пачĕç.
Источник: "Каçал Ен"