21 ноября 2009 г.
Информаци кунĕнче тĕрлĕ министерствăсемпе ведомствăсенчен килнĕ специалистсем ял çыннисемпе тĕл пулассине йăлана кĕртнĕ. Ноябрĕн 18-мĕ-шĕнче района информаци кунĕн тĕп темине, РФ Президенчĕ Д.Медведев Патшлăх Канашне янă Çырăвне сÿтсе явма, ялта пурăнакансене унпа паллаштарма Чăваш Республикин Патшалăх Канашĕн комитечĕн председателĕ А.В.Щербаков, ЧР Федераци регистраци службин управленийĕн ертÿçин çумĕ И.Н.Пудова, ЧР шалти ĕçсен министерствин уйрăмĕн начальникĕ П.Г.Федоров килсе çитрĕç. Вĕсем РФ Президенчĕ Д.Медведев Федераци Пухăвне янă Çырăвне ял çыннисемпе тĕл пулса сÿтсе яврĕç. Чи пĕлтерĕшлĕ ыйтусене хускатрĕç.
Район пуçлăхĕпе Г.Волковпа А.Щербаков Шурут ял поселенийĕнче пулчĕç. «Урожай» колхоз ĕçĕ-хĕлĕпе паллашрĕç. Хуçалăх ăнăçлă ĕçлекенсен йы-шĕнче. Кунта пур ĕçе те вăхăтра тата пахалăхлă пурнăçлаççĕ. Кăçал «Урожай» колхоз çĕр улминчен пысăк тухăç илнĕ. Хуçалăхри çĕрсене сухаланă, кĕрхи культурăсене акнă. Вĕсен усă курман çĕр лаптăкĕ çук, пурте çаврăнăшра. Информаци кунне хутшăннисем колхоз ĕçĕ-хĕлĕпе кăмăллă пулчĕç. Кăçал çĕнетсе хута яма палăртнă пушар хурал çуртне курсан вĕсем тĕлĕннине пытармарĕç. Сентябрь уйăхĕнче çеç пуçăннă ĕçе вĕçне çитерсе пыраççĕ. Малтан гараж пулнă вырăна кирпĕчрен купаласа хăпартнă, пысăклатнă, çĕнĕ алăксем лартнă. «Халĕ шалти ĕçсене пурнăçламалла, ăшă ямалла. Ун хыççăн машинăсене килсе лартмалла»,— терĕ А.Ершов. Ялта пушар хуралĕ пулни калама çук паха. Вут-çулăм тухсан пулăшу кĕске вăхăтрах çитесси куç кĕрет. Район центрĕнчен, 25 километртан машина киличчен «хĕрлĕ автан» йăлтах тĕп тума пултарать. Çакăн йышши пушар хуралĕ кашни ял поселенийĕнчех пулсан епле аван.
Иккĕмĕш ĕçлĕ ушкăна Чăваш Республикин шалти ĕçсен министрĕн пай начальникĕ, милици полковникĕ П.Г.Федоров ертсе пычĕ. Унпа пĕрле районти шалти ĕçсен пайĕн начальникĕ Г.Н.Кокшин Тукай ял поселени-йĕнче пурăнакансемпе тĕл пулчĕ. Петр Григорьевич чи малтанах Çĕнĕ Мăрат вăтам шкулĕнче вĕрентекенсемпе курса калаçма кăмăл турĕ. Вăл ноябрĕн 12-мĕшĕнче Кремлĕн Георгий залĕнче патшалăх пуçлăхĕ Дмитрий Медведев Федераци Пухăвне янă Çырăвне сÿтсе яврĕ. Пухăннисене çĕр- шывăн çитес çул пурнăçламалли ĕçĕсемпе теплĕн паллаштарчĕ.
Районти шалти ĕçсен пайĕн начальникĕ, милици подполковникĕ Г.Н.Кокшин 10 уйăхри ĕç-хĕл пирки каласа пачĕ. Вăл çавăн пекех çулталăк пуçланнăранпа районти шалти ĕçсен пайĕ преступлени тăвассине хирĕç кĕрешес, халăха хăрушсăрлăхпа тивĕçтерес тĕллевпе тунă ĕçсемпе те паллаштарчĕ. Йĕрке хуралçисем саккунсене çирĕп пăхăнса ĕçлени вара районта тăнăç та лăпкă пурнăç тытса тăма май парать. «Комсомольски районĕнчи шалти ĕçсен пайĕн сотрудникĕсем кăçал 10 уйăхра республикăра чи лайăххисем пулчĕç. Иртнĕ çулхи çак вăхăтпа танлаштарсан, уйрăмах преступленисене уçса парасси аванланнă. Обществăлла хăрушсăрлăх милицийĕн ĕçченĕсем те кăтартусем лайăхланччăр, район халăхĕ яланах вĕсен енчен хÿтлĕх туйтăр тесе тимлет. Пĕр сăмахпа каласан, милици ĕçченĕсем хăйсен тĕп тĕллевĕсене лайăх пурнăçлаççĕ, районти оперативлă лару-тăрăва ăнăçлă тытса пыраççĕ»,— терĕ Петр Григорьевич хăйĕн ĕçтешĕсем пирки. Учительсем тĕп хуламăртан килнĕ хăнана нумай ыйту пачĕç, тулли хуравсем илчĕç.
Каярахпа П.Г.Федоровпа Г.Н.Кокшин Тукай ял поселенийĕнчи участок уполномоченнăйĕн пунктне çитсе курчĕç. Асăннă участока В.Зайков милици сотрудникне çирĕплетнĕ. Петр Григорьевич ял поселенийĕнчи лару-тăрупа паллашрĕ, хăйне интереслентерекен ыйтусем çине тулли хуравсем илчĕ. Тем тĕрлĕ ыйту та кăсăклантарать хуларан килнĕ çынна: участокри эрех-сăрапа иртĕнекенсем те, çул çитмен ачасем тунă преступлени тата ыттисем те.
Ун хыççăн вара ĕçлĕ ушкăн Тукай ял поселенийĕн пуçлăхĕн П.А.Муллин кабинетĕнче пухăнчĕ. П.Г.Федоров кунти ĕçченсен çамрăк ăрăва тивĕçлĕ воспитани парас ĕçĕ-хĕлĕпе паллашрĕ. Петр Алексеевич кăçал сывă пурнăç йĕркине тытса пырас енĕпе халăхпа епле мероприятисем туса ирттерни çинчен каласа кăтартрĕ.
Кăнтăрла иртсен ĕçлĕ ушкăнсем район пуçлăхĕн Г.Ф.Волковăн кабинетĕнче пухăнса пĕтĕмлетÿсем турĕç.
Источник: "Каçал Ен"