11 ноября 2009 г.
Вĕренекенсене сывă пурнăç йĕркине хăнăхтарас енĕпе аслисем çине тăрсах ĕçлеççĕ. Акă, районти вĕрентÿ пайĕ тата диагностикăпа консультаци центрĕ «Сывă пурнăç йĕркишĕн» акцие ачасене явăçтарса «Плечом к плечу за ЗОЖ» волонтерсен конкурсне йĕркелерĕç. Унта вĕрентÿ учрежденийĕсенчи 12 команда хутшăнчĕ. Вĕсене тĕрлĕ номинацисенче хакларĕç.
«Чи лайăх социаллă реклама» номинацире Тăманлă Выçли тĕп шкулĕн команди мала тухрĕ. Хырай Ĕнел вăтам шкулĕн команди – иккĕмĕш, аслăчурачăксем — виççĕмĕш. «Сывă пурнăç йĕркине çутатакан чи лайăх урок» номинацире Комсомольски 2-мĕш вăтам шкулĕн вĕренекенĕсене çитекенни пулмарĕ. Комсомольски 1-мĕш тата Çĕнĕ Мăрат вăтам шкулĕн командисем — иккĕмĕшпе виççĕмĕш вырăнта. Комсомольски 1-мĕш вăтам шкулĕн волонтерĕсем «Чи лайăх стенд» номинацире çĕнтерчĕç. «Чи лайăх волонтер» — Виктория Салмина (Комсомольски 2-мĕш вăтам шкулĕ). В.Павлова (Çĕнĕ Мăрат) — иккĕмĕш, О.Полякова (Тăманлă Выçли) виççĕмĕш пулчĕç. Командăпа туллин, хитре паллаштарканнисем — çĕнĕмăратсем. «Плечом к плечу за ЗОЖ» конкурсра тĕплĕн хатĕрленнĕшĕн Хырхĕрри тĕп шкулĕн волонтерĕсем Хисеп хутне тивĕçрĕç.
Конкурс çĕнтерÿçисене парнесем, Хисеп хучĕ парса саламларĕç.
Источник: "Каçал Ен"