01 августа 2009 г.
Пăртак çумăр çуса иртни ял ĕçченĕсене савăнтарчĕ. Вăл уй-хирти ĕçсене чарса тăмарĕ. Районти ял хуçалăх предприятийĕсем пикенсех тырпула пуçтарса кĕртес тесе тăрăшаççĕ. «Нива» агрофирма, «Золотой колос», «Изамбаево» хуçалăхсемсĕр пуçне пур çĕрте те вырмана тухнă. Июлĕн 31-мĕшĕ тĕлне 1334 гектар çинче пĕрчĕллĕ тата пăрçа йышши тырăсем вырнă, 1158 гектарне çапса тĕшĕленĕ. Йĕтемсем çине 3335 тонна тырă кĕнĕ. Хальлĕхе вăтам тухăç пирки калама иртерех-ха. Çапах та вăл паянхи кун япăхах мар. Ытларах комбайнсем кĕрхи тулă, ыраш, урпа, пăрçа уйĕсенче тăрăшаççĕ. 490 гектар çинчен улăм пуçтарса илнĕ.
Хуçалăхсенче выльăх апачĕ хатĕрлесси те чарăнса ларман. Пĕр çул ÿсекен курăксене çулса пĕтернĕпе пĕрех. Ял хуçалăх предприятийĕсем 7712 тонна утă, 21235 тонна сенаж, 800 тонна силос хатĕрленĕ. «Дружба» ял хуçалăх предприятийĕ 3 гектар çĕрулми кăларса сутнă.
«Искра», «Урожай» колхозсем, «Труд» ял хуçалăх кооперативĕ çĕртме тума пуçланă. Кĕр тыррисем акма çĕр хатĕрлесси малалла пырать. Хальлĕхе 2928 гектар хатĕр çĕр пур.
Источник: "Каçал Ен"