01 августа 2009 г.
Июлĕн 30-мĕшĕнче пирĕн районта Чăваш Республикин агропромышленноç ыйтăвĕсемпе ĕçлекен Правительство комиссийĕн ларăвĕ иртрĕ. Ăна Ял хуçалăх министерствин коллегийĕпе тата республикăри агропромышленноç комплексĕн социаллă пурнăçпа экономика аталанăвĕн çирĕплĕхне ÿстерес енĕпе ĕçлекен комисси çумĕнчи ĕç ушкăнĕпе пĕрле йĕркеленĕ. Унта ЧР ял хуçалăх министрĕ Михаил Игнатьев, коллеги членĕсем, районсен пуçлăхĕсем, вĕсен ял хуçалăх енĕпе тимлекен çумĕсем хутшăнчĕç. Çак пысăк пĕлтерĕшлĕ мероприятире пăхса тухнă тĕп ыйтусенчен пĕри — Чăваш Республикинчи агропромышленноç комплексĕн 2009 çулăн пĕрремĕш çуррин пĕтĕмлетĕвĕсем тата малашлăха задачăсем палăртасси. Кунта выльăх-чĕрлĕх валли апат хатĕрлесси, вырма ĕçĕсем, кĕрхи культурăсене акасси те кĕреççĕ.
Ларăва хутшăнакансем пирваях «Çĕрулмие мухтав» агрофирмăн хирĕсемпе паллашрĕç. Çĕрулмине кăларса та пăхрĕç, унăн тухăçĕ мĕн чухлĕ пуласса тĕшмĕртме тăрăшрĕç специа-листсем. Агрофирмăн руководителĕ Хасият Идиатуллин, тĕп агрономĕ-менеджерĕ Алексей Селиванов, «Комсомольские овощи» ертÿçи Мингазым Шарафутдинов хăйсен ĕç-хĕлĕ çинчен каласа пачĕç. «Элеганс» Голланди вăрлăхĕнчен акнă кишĕр парка çитĕнет. «Ирень» сортлă кĕрхи тулă пиçсе çитнĕ ĕнтĕ, пĕр тикĕссĕн чÿхенсе ларать. «Ку культурăсенчен пысăк тухăç кĕтме пулать»,— терĕç агрофирма ĕçченĕсен ĕçне хакласа форума хутшăнакансем.
«Труд» ял хуçалăх производство кооперативне те çитсе курчĕç. Малтанах «Удача» сортлă çĕрулми уйĕнче чарăнчĕç. Аслă Чурачăк ялне çитсен икĕ ушкăна пайланчĕç. Агропромышленноç ыйтăвĕсемпе ĕçлекен Правительство комиссийĕн членĕсемпе районсен пуçлăхĕсем Чĕчкен ял поселенине кĕрекен моделлĕ библиотекăн, вăтам шкулăн, культура çурчĕпе пĕтĕмĕшле практика врачĕн офисĕн ĕç-хĕлĕпе кăсăкланчĕç. Район администраци пуçлăхĕсен ял хуçалăх енĕпе тимлекен çумĕсем «Труд» кооперативăн мăйракаллă шултра выльăх фермине çул тытрĕç. Кунта курмалли чăнах та пур. Василий Николаев председатель хăнасене ертсе çÿренĕ май ферма работникĕсен ĕçне çăмăллатас тĕлĕшпе юлашки вăхăтра туса ирттернĕ улшăнусем çинче чарăнса тăчĕ. Иртнĕ çул витесене тĕпрен юсаса çĕнетнĕ, механизациленĕ. Данире кăларнă сĕт сумалли установка вырнаçтарнипе сĕт пахалăхĕ лайăхланнă. Продукцие Шупашкарти сĕт заводĕнчен килсе илсех каяççĕ. Дояркăсен шучĕ чакнă. Халь вĕсен ĕç укçи те палăрмаллах ÿснĕ.
Йĕтем çине тырă килме пуçланă та ĕнтĕ. Хăнасем киличченхи каç çумăр çунипе çеç комбайнсем хире тухайман. Июлĕн 30-мĕшĕ тĕлне 230 тонна кĕрхи тулла çапса тĕшĕленĕ. Улăмне тÿрех пресласа пыраççĕ, кĕрхи культурăсене акма çĕр хатĕрлес ĕç те пырать.
Тукай Мишер ялĕнче вырнаçнă выльăх аш-какайне тирпейлекен «Деликат» цехĕн ĕç-хĕлĕ хăнасене чăннипех тĕлĕнтерчĕ. Кунта ĕне выльăх, сурăх какайĕнчен 150 тĕслĕ продукци хатĕрлесе упаковкăна чикеççĕ. Ĕç линийĕ Анăçри пекех, пысăк хăватпа ĕçлеме май парать. Пĕчĕк йышпах кунне 4—5 тонна, уйăхра 120 тонна продукци кăлараççĕ. «Эколь» суту-илÿ маркиллĕ тавар Раççейри 17 хулари «Ашан», «Карусель», «Метро», «Пятерочка», «Перекресток», «Росмарк» гипермаркетсенче сутăнать. Кунта ĕç условийĕсем лайăх, санитари нормисене çирĕп пăхăнаççĕ. Ахальтен мар Раççейĕн тĕп санитари врачĕ Г.Онищенко 2008 çулта кунта пулса курсан пĕр кăлтăк та тупайман.
Кăнтăрла иртсен район администрацийĕн ларусен залĕнче Коллеги хăйĕн ĕçне малалла тăсрĕ. Ăна Чăваш Республикин ял хуçалăх министрĕ Михаил Игнатьев ертсе пычĕ. Министр çумĕ Сергей Павлов «Чăваш Республикинчи агропромышленноç комплексĕн 2009 çулăн пĕрремĕш çуррин пĕтĕмлетĕвĕсем тата малашлăх задачăсем палăртасси» ыйтупа тухса калаçрĕ. Министрăн тепĕр заместителĕ Светлана Енилина 2009 çулта тĕштырăн чи пĕчĕк хакĕсем мĕнле пуласси çинче чарăнса тăчĕ. Пĕлтĕрхипе танлаштарсан, вĕсем питех уйрăлса тăмаççĕ. III класлă туллăн 1 тонни (клейковина хисепĕ 25 процентран пысăкрах пулсан) 5000 тенкĕ, клейковина 23—24 процент чухлĕ пулсан 4700 тенкĕрен кая мар сутма май пулĕ. Апат-çимĕçлĕх ырашăн тонни 3300 тенкĕ, фуражлăх урпа 3200 тенкĕ тăрĕ.
Э.Г.Максимова ялти килти хушма хуçалăхсенчи ял хуçалăх продукцине шута илессине мĕнле тĕрĕс йĕркелемелли, статистика сăнавĕсен формисене епле çырмалли пирки ăнлантарчĕ.
Коллеги членĕ, ЧР шалти ĕçсен министрĕн заместителĕ Вячеслав Яковлев ялсенче, хуçалăхсенче выльăхсене, транспорт хатĕрĕсене вăрланă тĕслĕхсем ÿснине палăртрĕ. Кооперативсенчен гербицидсем, ядохимикатсем те çухалаççĕ. Йĕрке хуралçисем нумай пулмасть преступлени тăвас тĕллевпе йĕркеленĕ пĕр ушкăна тытса чарнă. Çавна май Вячеслав Семенович район тата ял поселенийĕсен пуçлăхĕсене тимлĕрех пулма, каçхи хуралсене вăйлатма чĕнсе каларĕ.
Коллеги ларăвĕнче çавăн пекех награда материалĕ сене пăхса тухрĕç, кун йĕркинче сÿтсе явнă ыйтусемпе тивĕçлĕ йышăну кăларчĕç.
Источник: "Каçал Ен"