29 июля 2009 г.
Çĕр ĕçĕ кăткăс. Агрономсем тăтăшах пĕр-пĕрин опычĕпе паллашаççĕ. Пирĕн районти агрономсем те çĕнĕлĕхсене курасшăн. Акă, июлĕн 24-мĕшĕнче вĕсем Çĕрпÿри наукăпа тĕпчев институтĕнче пулса курчĕç. Ушкăна район администрацийĕн ял хуçалăх пайĕн тĕп агрономĕ И.Минетуллин, «Россельхозцентр» федераллă патшалăх учрежденийĕн районти филиалĕн начальникĕ Н.Чернова ертсе пынă. Вĕсене наука енĕпе ĕçлекен директорăн çумĕ А.Фадеев тата выльăх-чĕрлĕх туса илес енĕпе ĕçлекен пайĕн начальникĕ М.Фадеева кĕтсе илнĕ. Вĕсемех уй-хирсемпе паллаштарнă. Агрономсем хирсенче пахалăхлă, çĕнĕ йышши сортсемлĕ культурăсем туса илнине хăйсен куçĕпе курса ĕненчĕç. Чылай вăрлăха пирĕн районти хуçалăхсем унтан туянаççĕ. Çĕр ĕçченĕсемшĕн те тĕлĕнмелли нумай пулчĕ. Тĕлĕнмелли çеç мар, малашнехи кулленхи ĕçре те усă курмалла,— палăртрĕç вĕсем. Агрономсем вăрлăха тасатакан, типĕтекен паянхи кун ыйтăвне тивĕçтерекен çĕнĕ линипе паллашрĕç. Унăн хакĕ те пĕчĕк мар. 6 миллион тенкĕ тăрать. Хакне кура усси пысăк. Вăрлăхсене пахалăхлă тасатать.
Источник: "Каçал Ен"